Gaur barik astelehenean ekarriko dute "Kitxu"

Erabiltzailearen aurpegia Ukberri 2012ko abe. 22a, 16:01

Iñaki Gonzalo Casal "Kitxu" preso politiko itzubaltzetarra ez dute gaur ekarri Algortako tanatoriora, ostegunean zendutako amaren gorpua ikustera. Itzubaltzetako Herrirak zabaldu duenez, horren ordez "Kitxu" astelehenean 18:00etan hurbilduko dute Itzubaltzeta / Romoko San Jose elizara, Angela Casal Tubet zenaren hiletara. Hori dela eta, Herrirak arratsaldeko 5etan deitu du Santa Eugenia plazan harrera prestatzeko. Presoaren auzokideek azaldu dutenez, "Hasierako plana 'Kitxu' gaur Algortako tanatoriora ekartzea bazuten ere, atzo azken orduan Espetxeetako Zuzendaritzak planak aldatu zituen eta ez dute ekarri. Senideen arabera, gaur Basaurira hurbildu eta astelehenean hileta elizkizunetan izango da Iñaki. Hileta arratsaldeko 6etan izango da Itzubaltzeta / Romoko San Jose elizan". Argazkian, 2011ko urriaren 14an, Itzubaltzeta / Romoko Iñaki Gonzalo Casal "Kitxu" preso politikoa animo oihu eta txalo artean jaso zuten auzokideek. Gonzalo larri gaixorik zegoen ama bisitatzera eraman zuen Ertzaintzak.

Gaur goizean senideak, gertukoak, lagunak eta auzokideak izan dira Casal andreari azken agurrak emateko, lehenengo Algortako tanatorioan eta Derioko hilerriko errausketa-plantan ondoren. Senideek Angelak azken 16 hileotan izan duen jarrera goraipatu eta guztientzat eredugarria izan dela azpimarratu dute. Era berean, gaixo izan den bitartean hartutako berotasuna eta laguntza eskertu dute.

Angela Casal Tubet gaixotasun luze baten ondoren zendu zen ostegunean. Itzubaltzetako Herrirak salatu duenez, "Kitxu"ren espetxe zigorra pairatzeaz gain, "18 urtez, sakabanaketaren biktima ere izan zen. Zoritxarrez semea libre ikusi gabe joan zaigu". Gonzalo Casal azken hamalau hilabetetan birritan ekarri izan dute gatibu itzubaltzetarra etxera, Villanublako (Valladolid) espetxetik, ama bisitatzera: bata 2011ko urriaren 14an eta bestea 2012ko martxoaren 21ean. Parot doktrina aplikatzen ez badiote, maiatzean da kalera irtetekoa "Kitxu".

Iñaki Gonzalo Casal "Kitxu", Getxo irratiko eta Egin irratiko kazetari izandakoa, 1994ko urriaren 25ean atxilotu zuten Areetako Bizkaiko Zubiko plazan, Andoni Muñoz urduliztarra, eta Algortako Iñigo Otazua "Oti" zein Angel Figueroarekin batera. Ekintzarik burutu ez zuen Lanbroa komandoko kideak izatea leporatu zieten lauei, 30 urteko zigorra ezarriz. "Kitxu"-k hainbat liburu idatzi ditu espetxean.

Angela Casal Tubeten hil-mezua

angelita-eskela
Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun