"PP eta 'El Correo' egunkariak zaborren inguruan asmaturiko gezurren aurrean", auzo asanblada batera deitu du Getxoko Bilduk zaramaren eta garbiketaren inguruko akordioaren berri emateko eta atez atekoaren inguruan informazioa emateko. Batzarra gaur, asteazkena, izango da 19:30ean, Getxoko Andra Mari kiroldegian. Getxoko PPk abenduaren 18an lau haizetara zabaldutakoa gezurtatu zuen hurrengo egunean Bilduk. Popularren arabera, EAJk eta koalizio soberanistak "hitzarmena lotuta" omen zeukaten, udalerrian atez atekoa ezarri eta, horrek, "1,5 milioi euroko igoera" ekarri behar zuen zabor bilketa sisteman. Bilduko kideek prentsaurrekoan adierazi zutenez, "elkarrizketa prozesu luze bat eta gero aldaketa batzuk lortu ditugu pleguan baita beste puntu batzuen inguruko akordioa ere": esperientzia pilotu gisa, 20.000 biztanleko udal eremuan 5. kontenedorea (organikoa biltzeko) martxan jartzea, zabor batze sistemaren inguruan hausnarketa egiten hasteko udal lantalde berri bat sortzea zeinetan herritarrok eta alderdi politikook parte hartuko duten, belartzarrak deuseztatzeko lanetan belar‐pozoiak (herbizidak) erabiltzearen baztertzea, Larrainazubiko transfer plantak auzokideei sortzen dizkien kalteak 2013an konpontzeko Gobernuaren konpromisoa, etxeko olioa ere batzea, Gobelaren garbiketa sakonago bat egitea, eta kartelak inkatzeko panel publikoen beharra, besteak beste. Getxoko Udalak hilaren 21ean eman zituen garbiketa eta zabor-bilketa zerbitzuaren gaineko xehetasunak. Argazkian, Bingen Saitua, Maitane Nerekan eta Arantza Gutierrez Getxoko Bilduren zinegotziak, hilaren 19ko prentsaurrekoaren ostean.
Getxoko udal garbiketa, hondakin solidoen batuketa eta garraioaren eta antzeko zerbitzuen kontrataziorako baldintza tekniko partikularrei buruzko agiria ostegun honetako (abenduak 27) osoko bilkuran eztabaidatuko da. Bilduk aurreratu duenez, ez du oztopatuko onarpen hori eta abstenitu egingo da, udan hasitako elkarrizketa-prozesu baten ondoren Gobernu Taldearekin adostutako neurri batzuei esker. Udal batzarra goizeko 10etan izango da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun