Getxoko udalerria ekonomikoki bultzatu dezaketen esparru estrategikoak atzemateko eta jarduera plana zehazteko diagnostikoa abiatu du Getxolanek. Xede horrekin, Udalaren Ekonomi Sustapen eta Enpleguko Zerbitzuak Mondragon taldeko LKS kooperatiba kontratatu du, 44.528 euroren truke. Udalak zabaldu duenez, "Getxoren jarduera ekonomikoaren modernizazioa eta dinamizazioa" EAJko Udal Gobernuak finkatu zuen Legegintzaldi Planaren helburu estrategikoetako bat da. Ana Helguera Ekonomi Sustapeneko zinegotziak azaldu duenez, aipatu egitasmoa "tokiko garapen jasangarrian aurrera eraman beharreko jarduerak orientatzeko jaio da, beste eragile batzuekin elkarlanean, Getxo udalerria eta ingurua bizitzen ari diren aldaketetan proaktiboak izatera laguntzen duena". Jarritako helburu horiek lortzeko hurrengo hiru ardatz ezarri dituzte: lurraldearen diagnostikoa egitea eta etorkizuneko esparruak zehaztea; udalerriaren ekonomi sustapenarekin zerikusia duten eragile guztien partaidetza; eta lehentasunezko sektore horientzako jarduera planak zehaztea eta martxan jartzea. Argazkian, Ana Helguera zinegotzia Imanol Landa alkatearekin iaz / cc-by-nc-sa Ilanda.info.
Helguerak agindu du Udal sailen eta eragile publikoren, pribaturen, tokikoen zein udalen gainekoen partaidetza izango dela. Era berean, diagnostikoa egiteko informazio kualitatiboa eman ahal izango duten hainbat aurkezpen, elkarrizketa eta tailer egingo dira. Horri lotutako informazioa eman, edo ekarpenak eta iradokizunak egin nahi dituztenek getxolan[abildua]getxo.net posta elektroniko helbidera jo dezakete.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun