Sopelako Udalbatzak onartutako mozioak honakoa dio:
Herrira mugimenduak, Giza Eskubideen Deklarazioaren edukia aintzat harturik, euskal presoei aplikatzen zaizkien espetxe-neurri salbuespenezkoak indarrik gabe uztea eskatzen du.
Zehazki, sakabanaketa-politikari amaiera ematea eskatzen du, kartzelan dauden pertsonek eskubidea baitute zigorra etxetik hurbil betetzeko. Eskatzen du, bestetik, gaixotasun larria duten hamahiru presoak libre gelditu daitezela, eta Estrasburgoko Europako Giza Eskubideen Auzitegiaren epaia bete dadila, eta beraz, aska ditzatela zigorra bete duten 67 presoak.
Salbuespen neurri hauek sufrimendu handia eragiten dute gizartean, zuzenean neurri horiek jasaten dituztenei, baita gizarte osoari ere, apustu garbia egin baitu bakearen eta giza eskubideen errespetuaren alde. Eta sufrimendu hau buka dadin, neurri hauek desagerrarazteko, aski litzateke legeria arrunta aplikatzea.
Herrirak egiaztatu du gehiengo handiak bere egiten dituela aipatutako eskaerak. Horregatik, proposamena egiten die herritarrei giza eskubideen eta bakearen aldeko akordio sozial zabala egiteko, gutxienekoen taula bat presoen eta erbesteratuen problemari heltzeko, modu eraikitzailean eta egiazko konponbideak bilatu nahian betiere.
Eskaera honen atzean gizartea dagoela ikusarazteko, akordio sozial zabal honen ispilu izan dadin, Herrira mugimenduak manifestazio handi baterako deia egin du. Mobilizazioa Bilbon izanen da, urtarrilaren 12an, goiburu honekin: “Giza eskubideak, konponbidea, bakea. Euskal presoak Euskal Herrira”.
Horregatik guztiagatik, erabaki hauek hartzeko eskatzen diogu Sopelako Udalbatzari:
1.- Espainiako Gobernuari eskatzea presoen eta haien hurbilekoen giza eskubideak errespetatzen dituen espetxe politika aplikatzeko. Neurri hauek zigorra bizilekutik hurbil betetzeko eskubidea eta osasun eskubidea bermatu behar dituzte, baita beraien zigorra bete duten presoen askatasuna eta zigorraren 3/4ak (edo 2/3ak) bete dituztenen baldintzapeko askatasuna.
2.- Aditzera ematea Udala prest dagoela herriko bizilagun presoen giza eskubideen defentsan lan egiteko, eta haien senitarteko eta hurbilekoen egoera arintzeko.
3.- Horregatik guztiagatik, udal honek bat egiten du Herrira mugimenduak deiturik urtarrilaren 12an Bilbon “Giza eskubideak, konponbidea, bakea. Euskal presoak Euskal Herrira” goiburuarekin eginen den mobilizazio orokorrarekin, eta adierazten du prest dagoela akordio sozial zabal horren alde lan egiteko.
4.- Udal honek erabaki honen berri emanen die herritarrei, eta bakearen eta giza eskubideen errespetuaren aldeko lanean inplikatu daitezen animatuko ditu udalerriko bizilagunak.
Urtarrilaren 12ko presoen aldeko mobilizazio orokorrarekin bat egin du Sopelako Udalak
Sopelako Udalak bat egiten du Herrira mugimenduak urtarrilaren 12an Bilbon “Giza eskubideak, konponbidea, bakea. Euskal presoak Euskal Herrira!” lelopean antolatu duen mobilizazio orokorrarekin. Hala adostu zuten joan den osteguneko ohiko udal bilkuran. Mozioa alkatetza duen Bildu taldeak aurkeztu zuen, eta koalizio abertzalea osatzen duten zazpi zinegotzien aldeko botoa jaso zuen. EAJko zazpi ordezkariak abstenitu egin ziren, eta PSE-EEko zinegotzi biak eta PPko zinegotzi bakarrak aurka bozkatu zuten. Beraz, mozioak aldeko zazpi boto eta kontrako hiru boto jaso zituen, udal iturriek zehaztu dutenez. Bitartean, Gabon-egun hauetarako hainbat ekitaldi antolatu ditu Sopelako Herrira bilguneak. Besteak beste, abenduaren 28an, urteko azken ostiralarekin, kalejira egingo dute 20:00etan udaletxeko plazatik abiatuta. Eta 2012ko azken egunean, abenduaren 31n, preso eta iheslarien aldeko brindisa 20:00etan udaletxeko plazan. Bitartean, Meñakoz kultur elkarteak antolatuta, ostegun honetan, hilak 27, "Barrura begiratzeko leihoak" dokumentala egongo da ikusgai Sopelan. Hitzordua 19:30ean jarri dute Kurtzio kultur etxean. Argazkian, Sopelako Herrira bilguneak deituta, joan den igande eguerdian euskal preso eta iheslari politikoen aldeko Olentzero kalejira egin zuten / © Sopela.net.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun