Emakumeen aurkako indarkeria leporatuta getxoztar bat birritan atxilotu dute 48 ordutan
Getxo udalerriko 30 urteko gizon bat, V.A.J.S. inizialak dituena, birritan atxilotu dute 48 ordutan, emakumeen aurkako indarkeria leporatuta. Getxoko Udalak zabaldu duenez, emakume baten oihuek kezkatuta Algortako etxebizitza bateko auzokideek Poliziari deitu zioten Eguberri egunean. Bertaratu ziren agenteek emakumea erdi-biluzik topatu zuten eskailerak jaisten zegoela eta biktimak laguntza eskatu zien, ustezko erasotzailea, bere bikotekidea, oraindik etxebizitzan zelako. Poliziek gizonezkoa atxilotu zuten andra behin eta berriro kolpatu zuelakoan. Biktima, ordea, ospitalera eraman zuten, zituen kontusioak artatzeko. Andraren arropa zuhaitz baten adaburutik jaitsi behar izan zuten, erasotzaileak leihotik bota ei zuen eta. V.A.J.S. atxilotuta lotu zen asteartean eta atzo, hilak 26, epailearen aurretik pasa zen. Guardia epaileak inputatu eta hainbat kautelazko neurri ezarri zizkion, biktimarengana ez hurbiltzeko. Halere, bikotekidea Itzubaltzeta / Romon topatutako etxebizitza berria topatu eta haraino hurbildu zen. Gaueko 11etan, udaltzainek genero indarkeriaren biktima baten atarian pertsona susmagarri ikusi eta emakumearen txirrina jotzen ibili zela jakin ondoren atxilotu egin zuten berriz, urruntze agindua urratzeagatik. Gaur epaitegitik zen igarotzekoa.
Keltse Eiguren Berdintasun zinegotziak gertaera gaitzetsi eta gogoratu du “indarkeria sexista giza eskubideen urraketa larria" dela. Aldi berean, tratu txar fisiko edo psikiko jasaten dituzten emakumeak Gizarte Zerbitzuetara (944 660 151) jotzera animatu ditu, "bertan egoera horretatik ateratzeko laguntza emango baitiete". Eigurenek gogoratu du Udaltzaingora (944 660 202) edo Ertzaintzara (944 063 420) ere joan daitezkeela; baita Eusko Jaurlaritzaren tratu txarren biktimen telefono zenbakira (900 840 111) eta SOS Deiak (112) zerbitzura deitu ere. Argazkian, emakumeenganako erasoen kontrako kontzentrazioa Algortan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun