Sopelan bizi den Willy Uribe idazle eta argazkilari getxoztarra David Reboredo presoaren alde abiatu zuen gose greba mugagabea amaitutzat jo zuen atzo goizean. Urteberri egunean, 21 egun barauan eman zituen egunean, Uribek jakinarazi zuen "hemendik aurrera nire osasunak kaltetuta atera liteke, era itzulezinean". Hori dela eta, idazleak "borroka mota" horri bukaera jarri eta indarrak berreskuratzeari ekin zion. Halere, Vigoko David Reboredo toxikomano ohia eta droga gainditzeko hainbat elkarteren kolaboratzailea kartzelatik ateratzeko lanean jarraituko du Uribek. Era berean, Reboredoren sendiarekin batera, milaka pertsonek presoaren alde egindako lana eskertu zuen getxoztarrak. Komunikabideen jarrera ere baloratu zuen, bai Reboredoren egoera eta gose greba zabaldu dutenek egindako lana aitortzeko eta baita "auskalo zein interesen mesedetan bere lanbide-beharrak bete ez dituzten beste medio batzuen isiltasuna" kritikatzeko ere. Azkenik, Alberto Ruiz-Gallardon Espainiako Justizia ministroarekin gogoratu zen Uribe, orain aste batzuk David Reboredoren auzia aztertuko zueneko hitza eman zuena: "denbora aurrera doa eta ez da horretaz ezer gertatu. Horrek "Gobernu honek gezurra eta faltsukeria tresna politiko gisa erabiltzen dituela berriz ere pentsatzera" eraman du.
Willy Uribek Bartzelonan abiatu zuen gose greba, hilaren 11tn. Idazleak berak azaldu zuenez, Espainiako Gobernuek darabilten "indultuak emateko politika bidegabeek" eragin zuten bere ekimena. Zehazki, Uribek hiru eskaera egin zizkion Espainiako Gobernuari baraua uzteko. Hasteko, Vigoko David Reboredo toxikomano ohia eta droga gainditzeko hainbat elkarteren kolaboratzailea espetxetik atera eta ukatutako indultua ematea. Era berean, egungo eta aurreko Espainiako Gobernuek torturengatik kondenatutako lau "mosso d'esquadra"-ri zein Alfredo Saenz bankariari emandako indultuak azaltzea eskatu zuen idazleak. Ekimena lagundu nahi duenak David Reboredoren aldeko sinadura bilketarekin bat egin dezake.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun