Joan den abenduaren 25az geroztik Ertzaintza larderiaz egindako lapurreta salaketa bat ikertzen aritu da. Lapurreta Getxo udalerriko taberna batean gertatu zen. Lapurretaren autorea tabernara sartu zenean langile bakarra zegoen bertan, lokala garbitzen. Komunean giltzapetzera behartu zuen, eta bitartean kutxa erregistratzaileko dirua hartu zuen. Joan den urtarrilaren 1ean (hura ere jaieguna), larderiaz egindako beste lapurreta baten berri izan zen, kasu honetan Getxoko farmazia batean gertatu zena. Salaketaren arabera, arropekin aurpegia estaltzen zuen gizonezko batek, labana handi bat hartuta, saltzaileak mehatxatu zituen; dirua eskatu zien, eta nahi zuen zenbatekoa lortu zuenean ihes egin zuen.
Kasuan lanean ari ziren ikerketa agenteek argi ikusi zuten Errege Egunean eremu berean gertatutako pareko beste delitu batzuekin lotura argia zuela. Izan ere, goizaldean, gizonezko batek Getxoko Erribera kaletik zihoan oinezko bati lapurreta egin zion, labana handi batekin eta "modus operandi" eta ezaugarri bertsuekin. Egun berean, gauez, ustez autore berberak berriz ere lapurreta egin zuen arma zuri handi batekin, burua eta aurpegiaren zati bat arropa batekin estalita zituela; oraingo honetan erasoa Algortako taberna batean izan zen, eta bertako langile bat sukaldera sartzera behartu zuen. Gau horretan bertan, dirudienez, kaletik zihoan beste oinezko bati ere lapurreta egiten saiatu zen, oinezkoa higiezin bateko atari batera sartzear zela. Kasu horietan guztietan, erasoen biktima guztiak emakumezkoak izan dira.
Atxiloketa
Polizia lanak biharamunean eman zuen fruitua, eta herenegun, urtarrilaren 7an, Ertzaintzak, Getxoko Udaltzaingoaren laguntzarekin, lapurreta horien guztien ustezko autorea atxilotu zuen. Delitu aurrekariak dituen gizonezkoa da: 2010ean bi zerbitzugune eta farmazia batean larderiaz lapurreta egiteagatik atxilotu zuten, eta orduan espetxeratu egin zuten. 2011n berriz ere atzeman zuten larderiaz eta indarkeriaz lapurreta egiteagatik, eta orduan ere kartzelara bidali zuten.
Gizonezko bat atxilotu dute Getxon indarkeriaz egindako bost lapurreta egotzita
Ertzaintzak 39 urteko gizonezko bat atxilotu zuen herenegun, astelehena, Getxo udalerrian, larderiaz egindako zenbait lapurreta delitu egotzita. Ustez, aipatu lagunak, labana handi bat hartuta, farmazia batean egin zuen lapurreta urtarrilaren 1ean, eta urtarrilaren 6an beste bi lapurreta egin zituen, taberna batean eta kaletik zihoan herritar bati, Eusko Jaurlaritzaren Segurtasun Sailak zabaldu duenez. Abenduaren 25ean taberna batean armarik gabe egindako beste lapurreta bat ere leporatu diote, baita beste behin kalean lapurtzen saiatzea ere. Atxilotutakoa une honetan espetxe zigor bat betetzen ari da EAEtik kanpoko kartzela batean, eta, dirudienez, Eguberrietako espetxe baimena baliatuta egin zituen aipatutako delituak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun