"Año nuevo, PP nuevo?" hitzaldia emango du arratsean Algortan Iñaki Ezkerra idazleak
Iñaki Ezkerra Greño Bilboko idazle eta zutabelari eskuindarra urtebarriaz eta balizko Alderdi Popular berriaz mintzatuko da gaur Algortan. EAEko PPk zabaldu duenez, hitzordua Igeretxe hotelean jarri dute, arratsaldeko 19:30ean. Ezkerrak hitzaldia abiatu aurretik, Araba, Bizkaia eta Gipuzkoako PPren presidentea den Antonio Basagoitik eta Marisa Arrue Bergareche Getxoko PPren zinegotziak aurkezpenak egingo dituzte. Saioaren ostean, Ezkerrari galderak egiteko aukera izango da. Iñaki Ezkerrak 55 urte ditu eta "ABC", "El Correo Español" eta Onda Ceroko kolaboratzailea da. Gainera, EHUko Gizarte Kontseiluko kidea da. Ezaguna da literatura espainolaren munduan, idatzitako poesia, ipuinak eta eleberriengatik. Halere, ezagunagoa da bere politika iritzi eta ekimenengatik, prentsa kolaborazioak eta entsegu-lanak ere hartzen dituztenak. Ezkerra ETA, mugimendu abertzalea eta, oro har, euskal nazionalismoaren aurkako kritika gogorrengatik nabarmendu da. Argazkia: cc-public domain Iñaki Ezkerra.
PCEko kide ohia izanik, 80 eta 90eko hamarkadetan PSE-EEren alde egin zuen Iñaki Ezkerrak. Gauzak horrela, 2001ean, Redondo Terreros eta Mayor Orejaren arteko ituna babestu zuen. Ibarretxe nagusitu eta PSE-EEk Lopez idazkari nagusi aukeratu ostean, PPrengana biratu zen, Zapatero Espainiako presidentearekin eta Euskal Herrian zeraman politikarekin bat ez zetorrela. 2003ko udal hauteskundeetan, Antonio Basagoiti babestu zuen Bilboko udal hauteskundeetan, zerrendakide izanez. 2008an, Basagoitiren alde egin zuen berriz, EAEko PPren Kongresuan. 1998an, Ermuko Foroaren sortzaileetariko bat izan zen eta 2007an Foroko presidente hautatu zuten. Hurrengo urtean, Antonio Basagoitiren ildoa jarraitzeagatik bera eta bere sektorea kanporatu egin zituzten Jaime Mayor Orejaren zaleek. Tartean, 2003an, berak eta Gotzone Mora getxoztarrak polemika bizia izan zuten Julio Medem zuzendariarekin, "Euskal Pilota. Larrua harriaren kontra" filmetik haien lekukotasuna ken zitzan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun