Getxo udalerrirako prestatu zen hasierako orria berdiseinatu da, parte hartzen duten herri eta mankomunitate guztiak batzeko. Bertan, Euskal Herriko mapa batean Bizkaia dago nabarmenduta eta gainean sakatuz gero parte hartzen duten herri eta mankomunitateen izenak ikusi eta aukeratu ahal izango dira. Gainera, argitaratu diren azken eskaintza eta eskaeren zerrenda dago ikusgai.
Beharsarea euskarazko lana bideratzeko interneteko ataria da, doakoa eta euskaraz egiten den lana eskaini eta eskatzeko tresna erraz eta eraginkorra.
Lanak kategoriatan sailkatuta daude, baina lan mota guztiak bideratzeko balio du Beharsareak. Ildo horretan, lan partzialak zein lan profesionalak eskaini eta eskatu daitezke zerbitzu honen bidez. Euskaraz lanen bat egiteko jendea aurkitu behar izatekotan edota lana bilatu nahi izatekotan, www.beharsarea.net bide erraza eta zuzena da.
Getxo udalerrian hasita
Beharsarearen lehenengo aurkezpen ekitaldian, Koldo Iturbe zinegotziak bere poztasuna agertu zuen, "guretzat garrantzitsuak diren hainbat helburu betetzen ditu, tartean enpleguaren alde egitea, eta hori oso positiboa da, are gehiago pairatzen ari garen krisi garai latz honetan, lan bila ari diren eta kontratatu nahi duten lagunak harremanetan jartzen dituelako; euskararen erabilera sustatzea, pertsona euskaldunak eskatzen eta eskaintzen baitira eta gainera euskara teknologia berrietara hurbiltzea ere".
Rozio Luces Beharsarea.net-en funtzionamendua azaltzen (© Getxoko Udala)
Koldo Iturbe proiektuaren balorazioa egiten (© Getxoko Udala)
Egizu Getxo Euskaldun! elkarteak Beharsarea, Getxon lana euskaraz ekimena jarri zuen martxan 2011ko ekainaren 23an, tokiko Udalarekin elkarlanean. Gaur, urte t'erdi beranduago, jauzi ederra eman du euskarak lan munduan. Izan ere, gaurkoan Alkarbide Bizkaiko Foru Aldundiko Euskara Zerbitzuak aurkeztu du Beharsarearen eguneraketa, Getxoz gain, Leioa, Erandio, Bilbo, Balmaseda, Etxebarri, Igorre, Laukiz, Maruri-Jatabe, Lemoa, Durangoko Merinaldea eta Enkarterriko Mankomunitatea barne hartzen dituena. Guztira, 27 udalerriri eta 590.252 biztanleri, Bizkaiaren %51,22ri, zerbitzua eskaintzen die. Halere, litekeena datozen urteetan tresna gehiago haztea. Izan ere, Alkarbidek azaldu duenez, "proiektu irekia da, beraz, Euskal Herriko beste udalerri edo mankomunitateren batek parte hartzeko nahia izango balu Alkarbiderekin harremanetan jartzea baino ez du". Beharsarearen bidez, internet bidez hainbat esparrutan lan egin nahi duten euskaldunek eta horiek kontratatu nahi dituzten pertsonen arteko harremana erraztu nahi da. Beharsarea.net doako webgune bat da, "oso tresna sinple eta erabilerraza, bitartekaritza modu automatikoan egiten duena", Rozio Luces Egizuko dinamitzaileak Getxoko aurkezpenean argitu legez. Bi aukera eskaintzen ditu, lana behar dutenen zein langileak behar dutenen iragarkiak jartzeko. Lan horiek euskaraz burutu eta lan baldintza duinak errespetatu behar dituzte. Argazkian, Joxi Arakama udal teknikaria Rozio Luces eta Koldo Iturbe zinegotzia 2011ko aurkezpenean / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun