Ostegun honetarako, urtarrilak 17, eskubide sozialen inguruko solasaldia antolatu du Leioan Bagabiz plataformak. Hitzordua 19:30ean izango da, Sakoneta kiroldegian. Aipatu informazio eta hausnarketa saioan parte hartuko dute Bizkaiko Etxeko Langileen Elkarteak, Gizarte Zerbitzuetako teknikariak eta Berriotxoak (konfirmatzeke) taldeak. Mahai-ingurua plataformak antolatutako eskubide sozialen inguruko jardunaldien bigarren ekimena da, hilaren 3an etxebizitza eskubidea hizpide izan zutela Bilbo, Gasteiz eta Donostiako taldeen eskutik. Hurrengo ekimena, ordea, kafe herrikoia prestatzea izango da, aurreko bi saioetan entzundakoen errepasoa egin eta herrian landu nahi dituzten lehentasunezko gaiak erabakitzeko baliatuko dutena. Abenduaren 27an, Naroa Jauregizuria Bilgune Feministako kideak eta Xabi Sainz de la Maza gazte asanbladako partaideak aurkeztu zuten jendaurrean Leioako Bagabiz plataforma. Izan ere, aipatu taldea herriko Greba Batzordean emandako hausnarketa baten ondorioz sortu zen eta taldekideek azaldu zutenez, bere helburua elkargune bat sortzea da, "modu iraunkorrez, lan eta bizi baldintza duinen aldeko borroka egiteko". Argazkian, aurkezpeneko irudi bat.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
