Aurrekontuak lantzeko parte-hartze prosezua amaitutzat eman du Sopelako Udalak
Amaitu da 2013ko aurrekontuak lantzeko prozesu parte-hartzailearen lehen fasea Sopelan. Udal Gobernua osatzen duen Bilduk zuzenduta, azaro eta abendua bitartean auzo bilerak eta bilera sektorialak izan dira herriko hainbat gunetan, eta bertan, auzokideek euren iritzi, ekarpen, kritika eta proposamenak egiteko aukera izan dute. "Horretaz gain, Udal Gobernu Taldeko ordezkariek aurrekontu parte-hartzaileen nondik norakoak eta Udalaren osasun ekonomikoaren egoera azaldu dute. Hala, herritarrek zuzen-zuzenean jaso dute aurrekontuen inguruko informazioa. Eta alderantziz ere: udal ordezkariek herritarren ekarpenak zuzen-zuzenean jaso dituzte", adierazi dute tokiko agintariek. Bestalde, sopeloztarrek aurrekontuen inguruko inkesta betetzeko aukera izan zuten abenduaren 20ra arte. Bertan, euren lehentasunak markatu zituzten, hainbat aukeren artean. Prozesuaren eta inkestaren emaitzak aztertzeko, asanblada egingo dute ostiral honetan, urtarrilak 18, 19:00etan, Kurtzio Kultur Etxean. Argazkian, auzo-bilera Sopelmarren / © Sopelako Udala.
"Udalak bileretan eta inkestak betetzen prozesu honetan parte hartu duzuen guztioi eskerrak eman nahi dizkizue, eta prozesuan oraindik parte hartu ez duten lagunei etorkizunean parte hartzeko gonbitea luzatu gura dizue. Udal aurrekontuak denon kontuak direlako... parte hartu!", amaitu dute agintari sopeloztarrek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun