Bostetatik laugarrena
Antartikakoa "5 Itsaso" proiektuaren laugarren olatua izango da. Proiektu horretan, Acero planetako bost itsasoren olatu birjinak bilatzen ditu. Indonesian, Andaman (India) eta Angolan aritu ostean, Antartikako erronka zailari aurre egiteko prest dago surflaria.
Acerok olatu hori aukeratu zuen "Antartika oso urrutiko lekua delako eta, bertan nazioarte mailako olatua topatzea zaila bada ere, hain helezina den toki batera iristeak asko motibatzen nau. Gainera, Pakea Bizkaira igotzeko desioa aspaldikoa da eta azkenean gure helburuek bat egin dute", aurkezpenean adierazi zuenez.
Muturreko tenperaturek eta haize bolada gogorrek ez dute inola ere bere ilusioa murrizten. "Uraren tenperatura 2 eta 5 gradu bitartekoa da, baina tenperatura baxuei aurre egiteko bereziki prestatutako jantzi berezia dut, artilezko isolamendu batekin. Printzipioz, ordu eta erdi egon zaitezke uretan, baina beti ere mugimenduan, une batean gelditzen bazara, izoztuta gelditzeko arriskua duzulako", azaldu zuen.
"Uste dut hau dela bizitza osoan ikusi dudan lekurik politena". Horrela zabaldu du bart Kepa Acero surflari algortarrak Antartika kontinentera heldu deneko albistea. Acero Pakea Bizkaiaren espedizioaren barruan bidaiatu da izotz kontinentera, azken egunotan pinguinoek eta orkek lagunduta. Bertako uretan jada lehenengo probak egin ditu eta, jakinarazi duenez, ordu erdi aguantatu du uretan neoprenoa jantzita. Zero azpiko bi gradutan aritu da algortarra. Zehazki, Acero eta Pakea Bizkaiaren eskifaia osoa, Decepcion irlara heldu dira, Hego Shetland uhartedian, 60 latitudean. Argentinak, Txilek eta Erresuma Batuak bertako burujabetza aldarrikatzen dute. Kepa Acerok kontatu duenez, olatuen biharko aurreikuspena ona da eta, hortaz, glaziar baten azpian olatuak zelan apurtzen diren begiratuko du. Bere asmoa, Antartikan surfean arituko den lehenengo europarra izatea da, Bost Itsaso ekimena jarraitzearekin batera. Argazkian, surflari algortarra Decepcion uhartearen aurrean / © Kepa Acero.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun