Nazio ginkanaren funtzionamendua
Ginkanak kanporaketa moduan planteatzen dira eta taldeka jokatuko dira. Joko bakoitza ondo egin ostean, pista bat jasoko du talde bakoitzak, pista horrek beste leku batera eramango du eta bertan beste joko bat proposatuko zaio. Jokoa burututakoan, beste pista bat jasoko dute berriro, horrela lekukoa aurkitu arte. Talde irabazlea proba guztiak lehenago amaitzen dituen taldea izango da.
Antolakuntzaren oharrak
• Herri bakoitzeko talde bat, gutxienez, ateratzea da gure asmoa. Parte-hartzea zabala eta irekia izango da. Edonork har dezake parte. Herri bakoitzak parte hartuko duen talde kopurua muga dezake eta, adibidez, taldeak izen-emate ordenaren arabera onartu.
• Izen-ematea AEKren euskaltegietan egingo dugu, urtarrilaren 26ra bitartean.
• Taldekide kopurua mugatua izango da, 8 kidekoa asko jota (ahal dela taldeek gizon-emakumez osaturiko taldeak).
• Talde bakoitzak izena ematerakoan, 40 euro ordainduko ditu sortuko diren gastuei aurre egin ahal izateko. Partaide bakoitzari kamiseta bana emango zaio, kamisetak kolore ezberdinetakoak izango dira, taldeak bereizi ahal izateko.
• Ginkanak eskualdeka egingo ditugu. Otsaileko asteburuetan egingo genituzke aurre-kanporaketak. Eskualde bakoitzak erabakiko du noiz egin, bakoitzak bere egutegiaren arabera.
• Ondoren, martxoaren 2-3an edo 9-10ean, Herrialdeko kanporaketak egingo genituzke; eskualde bakoitzetik talde bat igaroko litzateke fase honetara, eskualdeko ordezkari gisa.
• Finalean, herrialde bakoitzeko talde batek hartuko du parte. Final hori Korrikaren amaierako jaian jokatuko dugu, hau da, martxoaren 24an Baionan. Honen ostean, sari banaketa izango da.
Arauak
• 8 partaide izango ditu talde bakoitzak.
• Proba egin eta pista jasotzeko, taldekide guztiek egon beharko dute.
• Ez da pista emango proba ondo amaitu arte.
• Talde irabazlea izango da proba guztiak eta ibilbide osoa lehen amaitzen duena.
• Taldekide guztiek eraman beharko dute oparitutako kamiseta.
Lekukoaren Bila ginkanaren deialdi-bideoa (© AEK)
Korrika 18ren bideoklipa (© Esne Beltza - AEK)
Euskara ikasleen eta gainontzeko herritarren parte hartzea bultzatzeko asmoz, Korrika 18k Lekukoaren Bila izeneko ginkana antolatu du, hau da, proba eta pista jolasa. Parte hartu nahi duen orok taldea osatu behar du, taldekide kopurua mugatua izango dela, gehienez 8 kidez osatuta, eta AEKren euskaltegietan izena eman beharko du urtarrilaren 26a baino lehen. Izena ematerakoan, taldekide bakoitzeko 5 euro ordaindu behar dira eta partaide bakoitzari kamiseta bana emango zaio (kamiseta horiek kolore ezberdinetakoak izango dira, ginkanako taldeak bereizi ahal izateko). Korrikako antolatzaileek zabaldu dutenez, probak askotarikoak izango dira eta "esfortzu fisiko apur bat, talde-lana, punteria ona, koordinazioa, oreka, trebetasuna, lotsa eza…" eskatuko dute. Herrialdeko kanporaketak martxoaren 2-3an edo 9-10ean egingo dira eta finala Korrikaren amaierako jaian jokatuko dute, hau da, martxoaren 24an Baionan. Hasierako elastikoez, euskaraz jolasteaz eta ondo pasatzeaz gain, talde irabazleak "bidaia zoragarri bat" ere irabaziko duela azaldu dute Korrika arduradunek. Argazkian, Korrika 18ren aurkezpena / cc-by-nd Euskalakari AEK.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun