Leioako udaletxean eta Artatza Jauregian 60 ezkontza zibil ospatu dira 2012an
Amaitu berri dugun 2012an Leioan 60 ezkontza zibil ospatu ziren, horietatik 31 Artatza Jauregian eta gainontzeko 29ak udaletxeko osoko bilkura gelan. "Esanguratsua da gero eta bikote gehiagok aukeratzen dutela ezkontza zibila euren egoera legalki formalizatzeko. Honetaz gain, aipatzekoa da Leioan ezkontzen diren bikotekide gehienak 30 eta 35 urte bitartean kokatzen direla", azpimarratu dute udal iturriek. Leioaztarrek eskuragai dute udaletxeko osoko bilkura aretoa astelehenetik ostiralera goizeko ordutegian. Bestalde, Artatzako ezkontzak urteko larunbata gutxi batzuetan baino ez dira ospatzen. "Desberdintasun hau ematen da Artatza Jauregia Lehendakaritzakoa delako eta Udalak alokatu egin behar duelako. Hau dela-eta Artatzan ezkontzeak 124 euroko kostua du ezkongaientzat, ostera, udaletxean egitea doakoa da", tokiko arduradunek azaldu dutenez. Argazkian, ezkontza bat artxiboko irudian.
Horretaz gain, azpimarratu behar da Artatzan zein udaletxean ezkontzeko bikotekideren bat Leioan erroldatuta egon behar dela gutxienez izena eman duenetik sei hilabete arinago.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun