Gazte 1+Ez! plataformaren ustez, "Urteetan estatu espainiarrak errusiar erruleta aktibatua izan du; gazte independentista eta ezkertiar izanagatik edozein gaztek egoera hau bizi behar izan du: jazarria, atxilotua edota kartzelaratua izateko arriskua. Hain zuzen ere, zilegi ez ezik, legezkoa izan beharko lukeen jarduera politiko batengatik". Horregatik, "Euskal Herrian benetako bake agertokia eta irtenbide demokratikoa lortzeko urratsak ematen ari diren garai honetan", hori bezalako egoera larriak ez dituzte ulertzen, "ezta haiekin bat etorri ere, eta bide horren aurkako logikan kokatuta daudela" uste dute. "Erruleta berarekin epaitu dira gazte hauek, epaiketa guzti hauek jatorri politikoa duten epaiketak dira. Ez dago defentsa juridikorik militantzia politikoa epaitzen den bitartean", gaineratu dute.
Azken urteetan Euskal Herrian bizi izandakoaren ondorioa da egungo egoera, "eta
nahiz eta gatazkaren konponbidean urrats sendoak eman diren, oraindik orain, euskal herritarron eskubide zibil eta politikoak urratuak daude", gogoratu dute protesten deitzaileek. Ildo horretan, gazteei ez ezik hiritar guztiei horren aurka Bilbon edota Donostian agertzera gonbidatu dituzte. Izan ere, "gazteriak urraketa hau zuzenean jasan badu ere, egoerak herritar guztioi eragiten digu. Jendartearen zati baten eskubideak urratuak badaude, hori jendarte osoaren demokrazia ezaren sintoma argia da. Horregatik, injustizia hauek salatzea denoi dagokigu".
Kondenatutako bost gazte oarsoaldetarretatik hiruk ezkutatzea erabaki dutela iragartzeko grabaturiko bideoa (© Oarsoaldeko Gazte 1+Ez!)
Euskal gazteria "libre eta legala" izan behar dela aldarrikatuko dute gaur eta bihar
Eleak mugimenduak eta Gazte 1+Ez! plataformak deituta, "Euskal gazteria libre eta legala!" lelopeko mobilizazioak izango dira gaur eta bihar. Gaur, iluntzeko 7:30ean, Bilboko Arriaga plazan jarri dute hitzordua. Bihar, ordea, Donostiako bulebarretik manifestazioa abiatuko da goizeko 12:30ean. Antolatzaileek gogoratu dutenez, iragan abenduaren 18an, Espainiako Auzitegi Gorenak Oarsoaldeko 6 gazteri ezarritako epai irmoa kaleratu zuen, bost gazte kondenatzen zituela. 2008ko apirilaren 18an Oarsaldean egindako sarekadan, 22 neska-mutil atzematen saiatu zen Espainiako Polizia. Harrapatu zituen guztiek tratu txar psikologiko, sexual eta fisikoak pairatu zituztela salatu zioten epaileari. Besteak beste, 2007an, gauza bera gertatu zen Uribe Kostan eta 11 gaztetik azkenean bakarra kondenatu eta berriz espetxeratu zuten: Josu Rodriguez "Nekora". 2009ko abenduaren 19an, Xabi De la Maza gorliztarra atxilotu zuten eta urte t'erdi espetxean eman ostean epaiketaren zain dago. Imanol Beristain itzubaltzetarra, ordea, 2010eko urriaren 22an atxilotu zuten eta, 16 hilabete preso egonda, oraindik ez dute epaitu. Eleak mugimenduaren arabera, "Antzeko egoerak gertatu ziren 2006tik 2010era. Izan ere, ehunka gazte atxilotu zituzten Araba, Bizkaia, Gipuzkoa eta Nafarroan poliziak egindako sarekadetan. Egun, atxilotuetako 109 gazte epaiketaren edo epai irmoaren zain daude. 82 kartzelaratu egin zituzten eta gehienetan inkomunikazio aldian tratu txarren itzala presente egon da". Argazkian, Algortan egindako lelo bereko manifestazio bat.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun