Etxebizitza horien sustapena Ganekogorta kooperatibari esleitu zion Eusko Jaurlaritzak 2012ko urriaren 14an. Onuradun suertatzen diren herritarrak kooperatibako kide izango dira, horretarako jartzen diren baldintzen pean. Eskubidea izango dute babes ofizialeko etxebizitzak eskatzeko baldintza orokorrak betetzen dituztenak; ez da derrigorrezkoa Etxebiden izena emanda egotea. Izena eman dutenen artean, zozketa bidez erabakiko da. Baina, lehentasuna izango dute Sopelan, gutxienez, eskabideak aurkezteko azken egunean 3 urte erroldatuta daramaten herritarrak.
Sustapen honi buruzko beste edozein argibide eskatzeko, hona jo daiteke:
Ganekogorta S. COOP.
Dato, 14-16, 2. solairua
01005 Vitoria-Gasteiz (Araba)
Tel.: 902 104 312
Sopelan, kooperatiba erregimenpean egingo diren babes ofizialeko etxebizitzen sustapenerako izena emateko epea ireki da. 90 etxe eraikiko dituzte Asu eta Bareño eremuetan, udal iturriek zehaztu dutenez. Asun 28 etxebizitza egingo dira, behekoa gehi bi solairuko bi bloketan, H1 eta H2 partzeletan. Bareñon, berriz, 62 etxebizitza egingo dira, G1 eta G2 partzeletan, behekoa gehi bi solairu izango duten beste sei bloketan. Etxebizitza guztietatik 55ek bi logela, egongela, sukaldea, bainugela eta komuna izango dituzte; eta 35ek beste logela bat gehiago. "Etxebizitza horiek egiteko proiektuak jasangarritasun, energia eraginkortasun eta ekodiseinu printzipioetan oinarrituta daude", gaineratu dutenez. Energia-eskaera gutxitzea ahalbidetuko duten neurriak edo aukerak izango dituzte, neurri pasiboak lehenetsiz (orientazioa, argi naturala aprobetxatzea...) eta instalatuko diren sistema aktiboak (klimatizazioa, ur beroa...) eraginkorrak izan daitezela bilatuz, eraikinetan bertan energia iturri berriztagarriak ezarriko direlarik. Eskaerak jasotzeko azken eguna otsailaren 18a izango da. Eskatzaileen erroldan sartzeko eskaerak, hartu-abisuarekin igorritako posta ziurtatu bidez egin beharko dira, errolda agiria gehituz, honako helbide honetara: Ganekogorta S. COOP. / 95 PK / 48920 Portugalete. Argazkian, Sopelako Udalak urbanizazio lanak abiatu zituen, 2008ko azaroan, Bareño eta Asu esparruetan / © Sopelako Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun