Digitalizazioak adierazpen artistikoen estandarizaziorako bidean lagunduko zuela zirudien arren, mehatxu hori ez da egi bihurtu. Arlo, diziplina eta jatorri guztietako artistek, teknologia ulertu, aztertu, bihurtu, eraldatu eta etxeko bilakatzeari ekin diote. Hain da zabala proposamen eta estrategien aniztasuna, nekez adierazi daitekeela bere osotasunean. "Bide zabalak" erakusketak, EHUko Arte Ederren Fakultateko sormen ingurua eta helburua partekatzen duten hamar artistaren lanak aurkezten ditu. Beraien obrak, testuinguru zein erreferentzia hurbil eta komunetatik jaio badira ere, norabide guztietara jotzen dute bortizki.
EHUko Arte Ederren Fakultateko ikasle eta irakasleak diren Augusto Zubiaga, Mariana Martin Zumarraga, Xabier Idoate, Silvia Ruiz, Jabier Villarreal, Silvia Abella, Maialen Arocena, Patxi Araujo, Xabier Barrios eta Izaskun Etxebarriaren lanak osatzen dute erakusketa hau.
Arte Ederretako hainbat ikasle eta irakaslek beraien lanak erakutsiko dituzte Eibarren
Euskal Herriko Unibertsitateko (EHU) Arte Ederretako Fakultateko irakasle eta ikasle talde baten lanak jasotzen dituen "Bide zabalak" erakusketa kolektiboa inauguratuko da ostiral honetan, urtarrilak 25, Eibarko Portalea Kultur Etxean. Tresna berrien erabileraren ondorioz sormen prozesuetan gaur egun indarrean dauden estrategia eta proposamen berrien lagin bat islatzen dituzte erakusketan bilduriko lanek. Erakusketa 19:00etan zabalduko dute, eta otsailaren 24ra arte egongo da ikusgai, 9:00etatik 21:30era astelehenetik ostiralera eta 10:00etatik 13:30era eta 16:00etatik 21:00etara larunbat eta igandeetan. Sarrera librea izango da, EHUko iturriek jakinarazi dutenez. Erakusketaren arduradunen arabera, azken urteetan, argazkiak, bideoak, marrazketak, instalazioak, eskulturak eta, modu batera edo bestera, sormen artistikoaren esparru guztiek aldakuntzak izan dituzte, material, gailu, komunikatzeko modu zein tresna berrien eraginez. Argazkian, ezkerretik eskumara, Josu Rekalde Arte Ederretako dekanoa, Jon Mikel Euba artista eta Carmelo Garitaonandia Bizkaiko errektoreordea, aurreko erakusketa batean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun