Antolatzaileek eman dituzten datuen arabera, jaso diren 423 pelikulen artean 85 izan dira aukeratuak egitarau ofizialean parte hartzeko. Horien artean, 17 izango dira film luzeak, 8 dokumentalak, 43 film laburrak eta 11 labur-esperimentalak. Gainera, aurten 6 antzezlan programatu dituzte, tartean, Bilborcken otsailaren 10ean ikusgai izan den “Cuando Martina encontró su historia”, bost urtetik gorako umeei zuzendutako lana, Zinegoak eta Mauma Elkartearen arteko lanaren fruitua den ekoizpena. Antolakuntzatik nabarmendu nahi izan dute 8 izan direla aurten Euskal Herritik jaso diren lanak eta horietatik 3 euskaraz eginikoak direla. “Oso datu esanguratsua da guretzat. Izan ere, ezin dugu ahaztu jaialdiaren helburuetako bat zinemagintza sustatzea dela gurean. GLBT gaia jorratzen duten Euskal Herrian egindako pelikulak topatzea oso zaila gertatzen bada, euskaraz eginikoak aurkitzea ia ezinezkoa egiten da eta, beraz, oso pozik gaude zentzu horretan, gure lanak bere fruitua badaukala “, adierazi du Bea Majuelo jaialdiko komunikazio arduradunak.
Hasiera gala eta ohorezko saria
Zinegoen hasiera ekitaldia urtarrilaren 31ean izango da Arriaga Antzokian, 20:00etan, Nia Acosta eta Josean Bengoetxeak aurkeztuko duten galaren bitartez. Bertan, Ohorezko Saria emango zaio Gaël Morel zinegile frantsesari, “bere lanaren kalitate artistikoagatik, duen konpromezu sozialarengatik eta zinemagintzan bai antzezlari moduan baita zuzendari moduan ere duen ibilbidearengatik”, esan du Pau Guillén zinemaldiko zuzendariak. Jaialdian zehar “Notre Paradis” bere azken film luzea ikusi ahal izango da dohainik.
Bilboko Gay, Lesbo, Trans Nazioarteko Zine eta Arte Eszenikoen Jaialdiaren 10. edizioak urtarrilaren 31tik otsailaren 10era bitartean izango du leku Bizkaiko hiriburuan eta, ondoren, otsailaren 13tik 26ra bitartean, beste 7 udalerritara zabalduko da Zinegoak. Gurean, Leioa, Algorta eta Sopelan izango dira emanaldiak. Horrenbestez, aipatu asteazkenean, "Keep the lights on" film luzea (gay eduki handia) egongo da ikusgai Kultur Leioan. Hurrengo egunean, otsailaren 14an, "Olhe pra mim de novo" eduki transexualeko dokumentala eskainiko dute. Ostegun horretan ere Algortan eta Sopelan izango dira saioak. Batetik, Villamonteko kultur etxean, "Cloudburst" film luzea (eduki lesbiko handia) emango dute; eta Kurtzio Kultur Etxean sei film laburren sorta, eduki transexual handiko "Maskarak" dokumentalarekin batera. Emanaldi guztiak 20:00etan hasiko dira. Argazkian, Zinegoak Bilboko Gay, Lesbo, Trans Nazioarteko Zine eta Arte Eszenikoen Jaialdiaren 10. edizioa aurkeztu dute gaur Bilboko La Bolsa aretoan Javi Regalado Hegoak Elkarteko presidenteak, Bea Majuelo jaialdiko komunikazio arduradunak eta Pau Guillén zinemaldiko zuzendariak / © Hegoak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun