Hezetasuna Auzoko Jai Batzordeari jarritako isunari aurre egiteko kontzertua izango da bihar Txorimalon

Getxoko Udalak Algortako Hezetasuna Auzoko Jai Batzordeari jarritako 600 euroko isunari aurre egiteko asmoz, larunbat honetan, urtarrilak 26, kontzertua izango da Txorimalo gaztetxe getxoztarrean. Horrenbestez, 21:30etik aurrera, Garrasika eta Mad Skins taldeak igoko dira oholtzara. Gauerditik aurrera, berriz, gaupasa egongo da DJak girotuta. Sarrera 3 eurotan izango da. Bihar ere, "gaur egungo eredu kapitalistak bultzatzen duen kontsumismo amorratuari alternatiba bat bezala", azoka egingo du Telletxe plazan, 10:00etatik 14:00etara, Algortako Gazte Asanbladak (AGA). Aipatu gunea "eremu zabal" bihurtu nahi dute egun horretan, non pertsona orok izango duen bere produktuak saltzeko edo trukatzeko aukera, "gehienetan ekoizle-sortzaile hauek ez dutelako espazio propiorik". "Beraz egin dezagun egun hau ahaztezina, eta bihurtu dezagun Telletxeko plaza azoka erraldoi bat!", adierazi du AGAk. Argazkian, aurreko kontzertu bat Txorimalo gaztetxean / © Baltzak.