Orain sestaotarrek dituzten proiektuak asko dira; Jangela herrikoi batetik Txikigune batera, musika taldeek entseatzeko lokalak, edo artea formakuntza eta trebakuntza bultzatzeko gelak. Sestaoko beste giza-kolektibo edo gizarte mugimenduek lantzen dituzten proiektuak ahaztu barik, herriaren beharrak asetzeaz gain. Guzti horiek laguntzeko borondatea badute.
"Sestaon jaio gara eta kulturaren ikusle hutsak izateko hezi gaituzte. Horretaz gain, udal gobernu ezberdinek gutxi egin dute herritarrei kalitatezko kultura eskaintzeko, herritarrak ez gara sentitu adierazpen kultural eta artistikoen parte ez protagonista sentitu" azpimarratzen dute txirbikideek.
Eraikina herritarren zerbitzura jarri dute, bizilagunei dohainik eta era autogestionatuan elkartzeko, aisialdia ez lukratiboari eta garapen pertsonal kritikoari tokia egingo dion leku bat eskaintzeko. Guzti hori, "instituzio publikoek kultura lehentasunen ordenean are eta gehiago zokoratzen duten garaian". Eta horrekin batera eraikuntza historiko horren mantentzea ziurtatzeko, utzikeriaren ondorioak sufritzen baititu.
Txirbilenearen aurkezpen bideoa (cc-by-sa-nc-nd Elurtuta)
Sestaoko kulturgunearekiko elkartasun jaialdia izango da bihar Udondo gaztetxean
Txirbilenea Sestaoko kulturgune autogestionatuaren aldeko jaialdia egingo dute bihar, larunbata, Leioako Udondo gaztetxean. Arratsaldeko 7etan, Txirbilenea proiektua aurkeztuko dute Leioako zentro sozialean. Bi ordu beranduago, kontzertuari emango diote hasiera, On eta The Cherry Boopers taldeak zuzenean arituko direla. Sarrera hiru eurotan eskuratu ahal izango da atean bertan. Txirbilenea proiektua pasa den urrian hasi zen, Sestaoko bizilagun talde batek AHV antzinako enpresaren hainbat bulego okupatu eta kulturgunea zabaldu zuenean. Izan ere, herriko giza kolektiboek denbora luzea zeramaten "instituzioen partetik soluzioak itxaroten", Txirbileneako kideek zabaldu dutenez. Azkenean, "zenbait belaunaldi helburu batek elkartu zituen: herriaren onurarako askatutako / okupatutako espazio hau autogestionatzea". Sestaoko eraikin adierazgarria da, gainera, AHVko ikastunena: "herri honen eta bere herritarren iraganaren testigu delako, eta beraz, etorkizunean ere izan dadin lan egingo dugu". Argazkian, auzokideek Txirbilenea kulturgunearen aurkezpena egin zuten pasa den urriaren 24an / © Sestao Okupa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun