Olatuen azken iragapenak ikusi ostean, gaur, astelehena, egingo dute Arnettte Punta Galea Challenge olatu haundien txapelketaren deialdia, Euskal Herriko Surf Federazioak (EHSF) iragarri duenez. Surflariak, epaileak eta antolatzaileak goizeko 10:30ean itsaslabarrean bildu omen dira eta txapelketa eguerdiko 13:00etan hasiko da. Arratsaldeko 17:00etarako amaituta egongo da eta sari banaketa bertan egingo dute. Muturreko surfeko lau ordu eskainiko ditu Arnettte Punta Galea Challenge olatu handien surf txapelketaren zazpigarren edizioak. Gonbidapenaren bitartez, 16 surflari europar onenetakoak bilduko ditu lehiaketak. Besteak beste, Axier Muniain 2007ko txapeldun zarauztarra eta Eneko Acero getxoztarra, nazioarteko maila duen surflaria, izango dira. Proba, Getxo Surf Taldeak eta Euskal Herriko Surf Federazioak antolatuta, besteak beste, Getxoko Udalaren laguntzarekin, 4 orduz egingo da. Azpimarratzekoa da, gainera, aurten, lehenengo aldiz, Big Wave World Tour (BWWT) olatu handien munduko zirkuituaren barruko Europako proba bakarra izango dela. Argazkian, azaroaren 9an aurkeztu zuten Punta Galea Challenge / © Getxoko Udala.
Surflariak Punta Galeako itsaslabarretik edo itsasontzietatik sartuko dira uretan. Antolaketakoek bi erreskate-motorrak eta Gurutze Gorriko ontzi bat ipiniko dituzte itsasoan. Jendeak itsaslabarretik bertatik ikusi ahal izango du proba. Leku itzela da, lehorretik edo itsasoan ontzietatik jende-mordoari probako eszenatoki osoa ikustea ahalbidetzen diona. Sarien atalari dagokionez, aipatu 6.000 euro banatuko dituztela esku-dirutan eta txapeldunak “wildcard” edo gonbidapen-txartela jasoko du BWWT-ko proba batean parte hartzeko.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun