Jon Rosalesen epaiketaren kontrako mozioa eztabaidatuko dute bihar Getxoko udal batzarrean
Egun hauetan Jon Rosales Palenzuela gazte algortarra epaituko dute Espainiako Auzitegi Nazionalean, beste zortzi euskal herritarrekin batera. "ETAri laguntza ematea" egotzita, 10 urteko espetxe zigor eskaerari aurre egin behar izango dio mutilak. "Akusazioan oinarri bakarra, inkomunikazio aldian, basaki torturatuta izan zenean ateratako deklarazioa da", salatu du Algorta-Getxoko Ezker Abertzaleak. Horren aurrean, Getxoko Bilduk mozioa aurkeztu du, biharko udal osoko bilkuran eztabaidatua izan dadin. Besteak beste, Rosalesen kontrako epaiketan "bere kezka adieraztea" eskatuko dio koalizioak Udalbatzari, "torturapean lortutako testimonioak frogatzat erabili daitezkeelako". Bestalde, "gatazka politikoa konpontzeari begira, inoren aurkako mehatxu, presio, atxiloketa eta tortura mota guztiak desagertzea" galdegingo diote, "baita inkomunikazio aldia ere; Osoko Bilkura hau horren defentsa eragile aktiboa izango dela". Azkenik, "Auzitegi Nazionala bezalako salbuespeneko epaitegiak eta salbuespen legeak desagertzea" eskatzeko gonbitea egitea luzatuko dio Bilduk Udalbatzari. Bere aldetik, Algorta-Getxoko Ezker Abertzaleak 16:30ean deitu du elkarretaratzea udaletxe aurrean; 17:00etan hasiko baita osoko bilkura. Gaur ere mobilizazioa izango da, 19:30ean Telletxe plazan. Argazkian, Maitane Nerekan Umaran Getxoko Bilduren bozeramailea.
Getxoko Bilduk adierazi du "bizi dugun gatazka politikoa konpontzeko Mitchell printzipioak gureganatzen ditugula: soilik bitarteko demokratiko eta baketsuak erabiltzeko beharra, eta elkarrizketa, negoziazio eta akordioaren bidez konpontzearena". "Era berean, kontutan hartu beharrean gaude gatazka gainditu ahal izateko baldintzen artean badaudela ondokoak ere: indarkeriarik gabeko egoera, jurisdikzio eta epaitegi berezien eta salbuespeneko lege oro indargabetzea, inkomunikazioa bertan behera uztea, inoren aurkako mehatxu, presio, jazarpen, atxiloketa eta tortura mota guztiak desagertzea, edozein dela ere pertsona horien jarduera edota ideologia politikoa", gaineratu du koalizioak. Horiekin batera, "aitortza, adiskidetzea eta erreparazioa zor zaizkio gatazka politikoak eta jatorri guztietako bortizkeriek eragindako biktima orori", amaitu dutenez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun