Era berean, Sopelako Udalak udalerriaren izen ofiziala aldatzeko prozedura hasi duen bitartean, Eusko Jaurlaritzak ere aukera hori aztertzeko eskatu dio tokiko erakundeari. Urtarrilaren 25ean Patxi Baztarrika Eusko Jaurlaritzako Hizkuntza Politikarako sailburuordeak gutuna bidali zion Sopelako alkateari. Bertan, egungo "Sopelana" izen ofizialak Euskaltzaindiak araututako euskal izenarekin, hau da, "Sopela" izenarekin bat ez datorrela gogorarazten du. Hori dela eta, Udalari prozedura hasteko aukera azter dezala eskatzen dio.
Urtarrilaren 21ean egin zen Euskara, Hezkuntza eta Kultura batzordera bueltatuz, alkatetzak egindako proposizioa aztertu zen (izen ofiziala aldatzea proposatzen duena), baita Euskaltzaindiak azken urteetan egindako hainbat ebazpen:
- 1979an osatutako Euskal Herriko Udalen izendegian, Euskaltzaindiak onartu eta gomendatu zuen forma "Sopela" izan zen.
- 1986an berretsi egin zuen erabaki hori Euskal Herriko Euskal Autonomia Erkidegoko herrien izendegian.
- 1987ko urriaren 28an, Onomastika Batzordeko Idazkari eta Euskaltzaindiako lehendakariorde Jose Luis Lizundiak irizpena eman zuen eta Udalera bidali, Sopelako udalerriaren izenean euskal era akademikoa "Sopela" dela argituz, Sopela delako eskualdeko euskaldunek herria izendatzeko erabili duten ohiko forma, toponomastikaren arau orokorrari jarraituz, bokalen arteko n-a galduz. "Sopelana" izena, aldiz, udalerriari deitzeko "versión romance" bezala izendatzen zen.
- 1997an, Euskaltzaindiak irizpen berri bat eman zuen aurrekoa berretsiz.
Sopelako Udalak lehen urratsak eman ditu udalerriko izen ofiziala aldatzeko, "Sopelana"-tik (egungo izen ofiziala) "Sopela"-ra (Euskaltzaindiak araututako izena). Azaroaren 29an Saioa Villanueva alkateak Euskaltzaindiari gutuna bidali zion, udalerriko izen ofizialarekin lotura zuten txosten guztiak udaletxean jasotzeko asmoz. Euskaltzaindiak dokumentazioa bidali zuen, eta udalerriko izen zuzena "Sopela" dela berretsi zuen, udal iturriek adierazi dutenez. Hortaz, Sopelako Udal Gobernuak izen aldaketarako prozedurarekin hastea erabaki zuen, eta proposizioa aurkeztu zuen urtarrilaren 21ean egin zen Euskara, Hezkuntza eta Kultura batzordean. Betitxe Saitua batzordeburuak hala eskatu ostean, Xabier Kintana Euskaltzaindiako idazkariak eta Mikel Gorrotxategi Onomastika batzordearen idazkariak bertan izan ziren. Proposizioa batzordean behin aurkeztuta, hurrengo urratsa udal bilkuran eztabaidatzea izango da. "Alderdi politikoek proposizioa aztertzeko aukera izan dezaten, udalerriko izen ofizialaren aldaketa otsaileko ohiko udal bilkuraren gai-zerrendan egongo da, urtarrilekoan egon beharrean", udal arduradunek azaldu dutenez. Argazkian, Mikel Gorrotxategi Euskaltzaindiako Onomastika batzordearen idazkaria, artxiboko irudian.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun