Agure bat, 90 urtekoa, harrapatu du auto batek Plentzian eta Gurutzeta ospitalera eraman behar izan dute. Eusko Jaurlaritzako Segurtasun Sailak jakinarazi duenez, ezbeharra arratsaldeko 14:15ak aldera izan da, Plentziako herrigunean. Agureak hainbat ubel eta kontusio hartu ditu. Baina ez da hori izan eskualdeko errepidetan gertatutako istripu bakarra. Atzo, goizeko 9:55ak aldera, Toyota Carina modeloko auto bat galtzadatik irten eta hainbat bider irauli zen Bi-637 errepidean, Leioan, Bilboko noranzkoan. "El Correo Español"-ek Ertzaintzaren iturriak aipatuz zabaldu duenez, autoan zihoazen lau gazteetatik bi zauritu ziren eta Gurutzetako ospitalera eraman zituzten. Su hartu zuen autoaren gidariari alkoholemia proba egin ziotenean positibo eman zuen. Hori dela eta, trafikoaren segurtasunaren aurkako delitua egotzi zion Ertzaintzak. Era berean, atzo goizeko 6:30ean beste auto bat irauli zen Enekurin, Bilboko aldean, Bi-624 errepidean. Gidaria, 36 urteko gizonezkoa, Basurtura eroan zuten arreta medikua jasotzera. Argazkian, pare bat ertzain trafiko kontrola ezartzen artxiboko irudian / cc-by Irekia.net - Eusko Jaurlaritza.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun