Proposamenaren gaineko eztabaidan, PSE-EEk ondo baloratu zuen ordenantzaren aldaketa. Izan ere, “bere garaian gure alderdiak etxebizitza horien segurtasuna handitze aldera” egin zuen eskaria aintzat hartzen baitu. Bilduk aurka bozkatu zuen “etxebizitzaren plangintza orokorraren politikari erantzuten ez dioten neurri zehatzak direlako eta espekulazioarentzat mesedegarri direlako”. PP proposamenaren alde agertu zen, baina “nahitaezkoa izango da Udalak etxebizitzen gainean hartuko diren segurtasun neurriak kontrolatzea, kontrako helburua bete ez dezaten, esate batera, burdin hesi bat ipini eta suteetako irteerarik ez izatea gerta ez dadin”. Joseba Arregi Hirigintza zinegotziak azaldu zuenez, “ordenantzaren aldaketa horrekin etxebizitza horien segurtasuna areagotzeko eta krisi garaian etxebizitzak egiten laguntzeko auzotarren eskaera jasotzen dugu”. Orain, arrazoibideak aurkezteko epealdia zabalduko da. Inolako alegaziorik aurkeztuko ez balitz behin betiko onartuko litzateke ordenantza.
Mozioak
Udalbatzako eztabaida nagusia mozioen atalak bereganatu zuen. "Guztiak testigantza gisakoak izanik", 3 onartu zituzten: bata PPrena, PSE-EEk babestua, urtean behin osoko bilkuraren batzarrerako gai bakarra “Udalerriaren egoera” izatea eskatzen zuena; PSE-EErena bigarrena, EAJren proposamenak jasoz, ura eta saneamenduaren giza eskubidearen aldekoa, Europako Herritar-Ekimenarekin bat egiteko, eta azken mozio bat, hori ere sozialistena, BBKri Algortako Urgull kaleko zahar-etxeko zerbitzuak gehiagotzeko eskatzeko. Bilduk aurkeztutako Jon Rosalesen epaiketaren kontrako mozioa, ordea, atzera bota zuten.
Getxoko Udalbatzak lehendik dauden eraikinetako beheko solairuetan kokaturiko lokalak etxebizitza bihurtzeko udal ordenantza onartu zuen atzo. Bilduk bozkatu zuen bakarrik erabakiaren aurka, “etxebizitzaren plangintza orokorraren politikari erantzuten ez dioten neurri zehatzak direlako eta espekulazioarentzat mesedegarri direlako”. Aldatzeko neurri horren helburua da "etxebizitzen babesa eta segurtasuna areagotzea, baita merkataritza-guneetan ere lokalak etxebizitza bihurtzeko erraztasunak ematea ere, beti ere baldintza jakin batzuk bete eta dendak auzoetako ardatz dinamizatzaile gisa errespetatzen bada", udal iturriek adierazi dutenez. Izan ere, kasu baterako, etxebizitza bihurtu ahal izango dira merkataritza-guneetan kokatuta egonda ere, fatxadara irekita patioa daukaten etxe beheetako lokalak, beti ere kale ondoan dagoen patioaren sakonera 4 metrotik gorakoa bada. Etxebizitzen segurtasunari dagokionez, segurtasun-elementuak erabiltzea utziko da, hala nola, pertsianak, beirak, xaflak, burdin hesiak, eta abar, beti ere, fatxadako illara ofiziala gainditzen ez bada eta eraikinaren baldintza estetikoak errespetatzen baldin badira. Aipatu segurtasun-elementuak, elementu zabukariak, iraulgarriak, izatea gomendatu dute, beharrezko mekanismoak erabilita. Argazkian, Joseba Arregi Hirigintza zinegotzia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun