Teknikariek egindako azterketaren arabera, sutearen gunea tarteko solairuko biltegiaren aldean eta bulegoetan piztu da eta inguru horretan gertatu dira kalterik handienak. Eraikinaren egituran izandako narriadurak gehien bat estalduran daude eta habe metalikoren bat kaltetu dute, lurrera erortzeko arriskurik ez egon arren, ezta Aquariumen ondoko eraikinetako negozioetan kalterik sortzeko ere. Eraikinaren beheko parteari dagokionez, kalteak sutearen keagatik eta suhiltzaileek erabili behar izan duten uragatik izan dira soilik. "Hala ere, han dauden ekosistemek eta itsas espezieek oso kalte gutxi jasan dituzte", aipatu dute arduradunek.
“Zentroaren balio hezkuntz-didaktiko eta turistikoa dela eta, gaur bertan hasiko da garbitzen eta abiatuko dituzte konponketa lanak, lehenengoak eta premiazkoenak, zentroa, Bizkaian dagoen akuario bakarra, ahalik eta lasterren zabaldu nahi baitugu, zorionez kaltetuta gertatu ez den itsas aberastasun itzel horrez hiritarrek gozatzen jarraitu dezaten”, adierazi du Keltse Eiguren Getxoko Udaleko Ingurumen zinegotziak.
300 espezie
Gogoratu behar da Getxo Aquarium Estatuan dauden zentroetatik 10 onenen artean dagoela. 2012an 18.165 lagun igaro ziren bartatik (aurreko urtean baino %1,86 gehiago), eta horietatik 7.383 nagusiak izan ziren (+%2,54) eta 5.014 umeak (+%62,75). Getxo Aquariumak bi alde ditu, 300 espezie baino gehiagorekin. Bata Atlantikoko ekosistemei dago dedikatuta eta bestea tropikalei. Kirol Portuko instalazioetan itsas biotopo askotarikoak hartzen ditu, alga eta arrainez beteriko hogei bat andeletan, hurbilekoak diren espezieekin zein tropikal exotikoekin (zirujau delako arrain deigarriak, esate batera), anemonekin edo krustazeoekin.
Getxo Aquariumean izandako suteak eragin "oso txikia" izan du arrain eta ekosistemetan
Gaur goizaldean Getxo Aquariumean izandako suteak ez du kalte pertsonalik eragin eta han dagoen itsas faunan izandakoak oso txikiak izan dira, udal iturriek adierazi dutenez. Oraindik ez dira sutea eragin duten arrazoiak ezagutzen. Arrainei eta ekosistemei dagokienez, esan, lupiak, urraburuak eta algak zituen arrainontzia baino ez dela kaltetuta gertatu. "Horiek babestuta ez dauden espezieak dira eta ez daude desagertzeko arriskuan", azaldu dutenez. Arrainontzi hori hustu eta beste bat jarri egingo da. Hurbil zegoen beste arrainontzietako batean hiru arrain hil dira (muxar bat, boga bat eta krabarroka bat). Tokiko arduradunen arabera, "horiek ez dute galera biologiko handirik". Hirugarren arrainontzian bizi diren momarrak, arretagatik, gaur goizean bertan eramango dituzte Gijoneko akuariora eta ondoren Getxora itzuliko dira. Bestalde, akuarioko alde tropikala funtzionamenduan dago eta ez du kalterik jasan. Udal teknikariek burututako lehenengo azterketaren ondoren, gaur bertan hasiko dira izandako kalteak konpontzeko beharrezko lanak aurrera eramaten. Lan horien iraupena hilabete batzuetakoa izatea aurreikusten da eta beren kostua ebaluatzen ari da. Argazkian, suhiltzaileak Getxoko Kirol Portuko akuarioan / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun