Uribe Kostako herrien eta campusaren arteko autobus-linea jartzea berraztertzea eskatu dio Bilduk Aldundiari
Sei hilabete igarota, berriro ere Sopelako San Pedro eliza ondoko autobus-geltokian egin dute prentsaurrekoa Uribe Kostako Bilduko hainbat zinegotzik. Orain urte erdi, Bizkaiko Foru Aldundiak autobus-lineen berrikuspena egiten ari zen herrialde osoan, eta koalizio ezkertiarrak alegazioak helarazi zizkion, eskualdeko herri ezberdinetan topatu zituzten gabezietan oinarrituz. Besteak beste, Uribe Kostako herriak eta Leioa-Erandioko campusa lotuko dituen autobus-linea sortzea proposatu zion Bilduk Aldundiari. "Zoritxarrez, alegazioak aurkeztu genituenetik urte erdia pasa denean, markesina honetan hitzordua jarri behar izan dugu berriro ere. Izan ere, foru erakundeak ez ditu aintzat hartu Bilduk egindako proposamenak, eta aurkeztutako alegazio guztiei ezetza ematea erabaki du", azaldu du Maitane Nerekan zinegotzi getxoztarrak. Horren aurrean, "itsu-itsuan proposamenei ezetz erantzun beharrean, erabiltzaileek dituzten beharrizanak kontuan hartzea" eta, horren arabera, autobus-linea hori sortzeko aukera berriro aztertzea eskatu diote ezkertiarrek Aldundiari. Izan ere, gogoratu dutenez, "Uribe Kosta osoan campusera doazen autobusak Getxotik bakarrik irteten dira". Argazkian, ezkerrean, Fernando Larrinaga Bizkaiko Batzar Nagusietako batzarkidea izan dute lagun gaur Bilduko ordezkariek / © Uribe Kostako Bildu.
"Aldundiko arduradunen iritziz, ordea, Uribe Kostako udalerriek hainbat aukera dituzte Leioa-Erandioko campusera heltzeko, metro eta autobusen arteko trasbordoen bidez, eta beraz, ez dute beharrezkoa ikusten linia berri bat sortzea. Dagoen bezala mantentzea proposatzen dute; hau da, ordu bete baino gehiagoko trasbordo korapilatsuekin, eskualdean bertan dagoen campusera heltzeko, eta unibertsitate publiko batera heltzeko", kritikatu dute Uribe Kostako Bilduko ordezkariek. Erabiltzaileez gain, eskualdeko hainbat erakundek ere norabide berean eskaera berdinak egin dituztela mahaigaineratu du koalizio ezkertiarrak: "Sopelako Udalak, esaterako, EHUrako autobus-linea sortzea onartu zuen ekainean, sopeloztar ugariren kexak jaso ostean. Akordioa, gainera, udal batzarrean alderdi politikoen kontrako botorik gabe hartu zen".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun