Bart jai batzordeak eta Hegoalde elkarteak gogoratu dutenez, Erandioko Udalak eta EAJk abiatu zuten prozesua, Ertzaintzari ikerketa abia zezan deituta. Polizia Autonomikoak Auzitegi Nazionalera igorri zuen auzia eta Grande Marlaska epaileak diligentziak zabaldu zituen. 2012ko urtarrilean deklaratu ostean, epaiketa aurrera eramatea erabaki zuen Marlaskak. Auziperatu bakoitzarentzat 18 hilabeteko espetxe zigorra eta 8 urteko inhabilitazioa eskatzen du fiskalak. Epaiketa asteartean, goizeko 10etan, hasiko da, Madrilgo San Fernando de Henares herriko pabiloietako batean.
Erandio-Altzagako Jai Batzordeak eta Hegoalde Kultur Elkarteak "absurdotzat" jotzen dute epaiketa, "epaitutako iragarkian ez zegoelako ez esaldi ez irudi iraingarririk". Are gehiago, "adierazpen askatasuna eskubidearen aurkako eraso larria" dela uste dute. Gaurko manifestazioaz aparte, autobusa antolatu dute hiru auziperatuak Madrilen ere babesteko. Karraka eta Hegoalde tabernetan eman daiteke izena.
Martxa iruditan
Asteartean Espainiako Auzitegi Nazionalean epaituko dituzten 3 erandioztarrei atxikimendua erakutsi diete bart 300 auzokidek baino gehiagok. Dozenaka andra eta gizon jaietako zapia lepoan eraman dute euri azpian egin dute manifestazioan, Erandioko Altzaga auzoan zehar. Bertan, epaiketa ez egiteko, Auzitegi Nazionalak Erandio bakean utz dezan eta adierazpen askatasuna aldarrikatu dituzte. Besteak beste, Arantxi Sarasola LABeko Zuzendaritzako kideak, Santi Neira Erandioko Kultur zinegotzi ohiak (EAJ) eta Iker Jalon Erandioko zinegotziak (Bildu) hartu dute parte martxan. Auzia 2011ko Erandioko San Agustin jaietako liburuxkan Hegoalde kultur elkarteak ipinitako iragarkiagatik abiatu zuten. Iragarki horretan, Ekin erakunde politiko ilegalizatutako kidea izatea leporatu zioten, Hegoaldeko bi bazkideren alaba den eta egun kalean dagoen Erika Bilbao preso erandioztarraren argazkia agertzen zen, eta arrano beltzaren logotipoa. Hori "terrorismoaren goratzea" delakoan, zigorra ezarri nahi diete, Iñaki Doñabeitia Erandioko Altzaga auzoko Jai Batzordeko presidenteari iragarkia ez zentsuratzeagatik eta Jose Angel Torre "Txantxel" eta Mikel Urriz Hegoalde Kultur elkarteko zuzendaritza kideei iragarkiaren erantzule gisa. Argazkian, manifestazioaren burua.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun