Udaberri bezperan ama lurra esnatzeko erabiltzen omen ziren Agate Deunako makil kolpeak antzina. Egun, ez da halakorik behar, ama lurra beti baitago esna, emakumeak erailtzen dituen zibilizazio basati beraren esplotaziopean lo egin ezinik. Agate Deunak ekaitzetatik eta suteetatik babesten zituela ere sinesten omen zuten gure arbasoek. Neoliberalismoaren egungo ofentsibaren aurrean, borrokaren tximistek eta trumoiek saihestezinak dirudite, baina. Agate Deunako makilak jendarte-borrokarako erabili beharko, bada. Borroka horren jomugan sistemaren izaera patriarkala ere jarri ezean, ordea, erdipurdiko kolpeak baino ez dizkiogu joko –eta emakumeen zein ama lurraren aurkako biolentziak bere horretan jarraituko du–. Hortaz, jendartea eta haren sostengua den ama lurra bera are gehiago hondatzea saihestu nahi badugu, ustezko zibilizatuok lehenik eta behin hobe dugu geure burua makil kolpetxo batez esnatu eta atsotitz hau ondo-ondo ikasi: “Gure borroka, feminismoa kendute, ahuntzaren gauerdiko purrute".
Koldo Larrea Antxia "Itxina" (Itzubaltzeta / Romo)
Gizonezko boteretsu bati ezetz esateagatik eta bere sinismenei irmoki eusteagatik, burdel batean gatibu sartu, torturatu eta erail egin zuten Siziliako Agate III. mendean. Basakeria horiek guztiek XXI. mendean ere puri-purian jarraitzen dute: emakumezkoen salerosketa auzoko putetxean aurki daiteke; kuarteletik, espetxetik edo bikotekidearen atzaparretatik pasatutako andre askok salatzen ditu tratu txarrak edo tortura; bular mozketen notiziak Juarez Hiritik etortzen zaizkigu batik bat, baina bortxaketak gure hiri eta herrietako kale eta etxe askotan gertatu ohi dira, eta azken urtebetean Tolosa, Durango, Bilbo, Senpere, Araia edo Antsoainen emakumeen erailketak jazo dira. Biolentzia mota jakin bat hain sutsuki jazarria izan den herri honetan, bizitza gorabehera handirik gabe doa aurrera bortizkeria adibide horiek guztiak begi bistakoak izan arren. “Espero dezagun berriro ez gertatzea”, dio bihotz oneko jendeak halako gertaeren aurrean. Tamalez, biolentzia patriarkala dakarten faktore kulturalak benetan errotik ezabatu ordez, adabakiak josten esperoan geratuz gero, tratu txarrak, bortxaketak eta erailketak zalantzarik gabe berriro gertatuko dira: etxean, eskolan, komunikabideetan eta gainerako esparruetan benetako berdintasunean hezten ez dugun belaunaldi bakoitza emakumearen aurkako biolentzia birsortzeko lur ongarritua da. Argazkia: © Getxoko Kultur Etxea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun