Inauterietan tabernak ixteko ordua luzatuko du Getxoko Udalak Algortan eta Itzubaltzetan
Getxoko Udalak ostalaritza establezimenduak zarratzeko ordutegia luzatuko du inauterietan Algortan eta Itzubaltzeta / Romon, "krisiaren eraginez zailtasun handiak jasaten ari den sektorearen ekonomia jarduerari laguntzeko", tokiko arduradunek jakinarazi dutenez. Horrenbestez, otsailaren 8 eta 9an, ostirala eta larunbatean, Algorta eta Romoko 1. multzoko tabernak (dastalekuak, izozki-dendak, txurro-dendak...) 02:30 arte egon ahal izango dira zabalik; 2. multzokoak (kafe-etxeak, tabernak...) 04:30 arte; 3. multzokoak (pubak, klubak...) 06:00ak arte; eta 4. multzokoak (diskotekak...) 08:00ak arte. Ordutegi berdina izango da hilaren 15ean eta 16an, baina Algortan bakarrik. Algortan, tokiko jai batzordeak; Itzubaltzeta / Romon, jai batzordeak, Itzubaltzeta gaztetxeak, Ziztu Bizian eskaut taldeak eta Zasi Eskola dantza taldeak; Areetan, Berantzagik; eta Getxon, Itxas Argiak antolatu dituzte ekintza egitarauak. Horiek jasotzen dituzten jarduerak dira, besteak beste: mozorro lehiaketak, umeentzako tailerrak, desfileak, erromeriak, txokolate-janak eta musika. Argazkian, eskola Inauteriak Itzubaltzeta / Romon, artxiboko irudian / © Getxoko Kultur Etxea.
Algortari dagokionez, hilaren 9, 10, 15 eta 16an izango dira jarduerak; Areetan eta Romon, larunbat honetan, hilak 9, eta Getxon igandean, hilak 10. Jarduera horiekin batera, udalerriko ehunaka ikaslek egiten dituzten ohiko desfileak ere izango dira, ikastetxeek beraiek antolatuta, ostiralean. Romo-Areetan, kalejira 10:15ean hasiko da Romo herri ikastetxean; eta Algorta-Andra Marin, desfilea 10:30ean aterako da, Sarrikobasoko biribilgunetik.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun