Proposizioak jasotzen duen legez, alkateak honako konpromisoak hartzen ditu, "Sopelana Gurea" aldizkariaren espazio eta edukiei dagokienez:
- Aldizkaria zabalik egongo da herritarren iritzietara, eta herriko elkarte eta erakundeek aldizkarian lekua izango dute, herritarren parte-hartzea sustatuz.
- Aldizkariak udal bilkuren eztabaiden berri emango du, honako ezaugarriak oinarri hartuta: objektibitatea, neutraltasuna, egiazkotasuna eta aniztasun politikoa.
- Udalean ordezkaritza duten alderdi politikoentzako leku nahikoa izango du. Alderdiek euren mezua zuzenean adierazteko eskubidea izango dute, eta gaiak bozeramaile batzordean adostuko dira aldez aurretik. Horretarako, hilabetero (hori da aldizkariaren maiztasuna) orri bat izango dute alderdi politikoek, berdintasunean oinarrituz. Espazio hori, dena den, herritarrei zuzendutako zerbitzu publiko legez ulertu behar da, eta ez alderdien arteko konfrontazio politikorako.
Era berean, Enpleguaren Sustapen, Turismo eta Komunikazio Batzorde Iraunkorrean Udal Gobernuak arlo honetan emandako urratsen berri emango du, alderdi politikoen iritzi eta jarrerak jasoz, ahalik eta adostasun mailarik handiena lortzeko asmoz. Batzorde horretan, aldizkariren edukien berri emango da, aldizkaria kaleratu aurretik.
Auzokideak, merkatariak eta elkarteak
Gainera, alderdi politikoentzat gordetako orriaz gain, "Sopelana Gurea" aldizkariak herriko elkarteentzat gordetako orrialdea ere badu. Bertan, herriko elkarteek euren ekintza eta informazioak kalera ditzakete. Horretaz gain, komertzioek ere "Hilabeteko komertzioa" izeneko atala dute, eta bertan euren komertzioen nondik norakoak azaltzeko aukera dute. Azkenik, herritarrek ere zuzenean euren iritzia emateko aukera dute, kale-inkestaren bidez.
Auzokideek udal aldizkaria hobetzeko ekarpenik izatekotan, honako e-postara idatz dezakete: sopelakoudalakom[abildua]gmail.com.
Alderdi politikoek iritzia emateko tokia izango dute Sopelako udal aldizkarian
Sopelako Udalean ordezkaritza duten lau alderdi politikoek beraien espazioa izango dute aurrerantzean "Sopelana Gurea" aldizkarian. Hala adostu zuten urtarrilaren 31ko udal bilkurak, aldeko hamar botorekin: Bilduko zazpi zinegotziak, PSE-EEko zinegotzi biak eta PPko zinegotzia. EAJko zazpi ordezkariek, ordea, aurka bozkatu zuten. Onartutako proposamena Bilduk zuzendutako Udal Gobernuak aurkeztu zuen, eta PSE-EE taldeak emendakina aurkeztu ostean onartu zen. Adostutako testuan, aldizkariko testuetan “iritziak eta informazioak” ezberdintzeko beharra azpimarratzen da, eta “aniztasun politiko, sozial, kultural, erlijioso, identitario eta hizkuntza aniztasuna” errespetatzea ezinbestekotzat jotzen da. Halaber, “euskara bultzatzeko” beharra ere nabarmentzen da. Argazkian, udal bilkura Sopelan, artxiboko irudian / © Sopelako Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun