Bizkaiko Garraio Partzuergoko Kontseilu Nagusi berria 26 lagunek osatzen dute. Erakunde horretan, Eusko Jaurlaritzak 13 kide dauzka eta Aldundiak 2, eta 11 kidek lurraldeko hainbat udalerri ordezkatzen dituzte. Jarraian, bederatzi lagunek osatzen duten Batzorde Betearazlea hautatu da eta Metro Bilbaoko Administrazio Kontseilua, lehendakaria ahaldun nagusia dela. Hedabideen aurrean egindako agerraldian, José Luis Bilbaorekin batera egon dira Antonio Aiz Lurralde Plangintza eta Garraio Sailburuordea eta Itziar Garamendi Herri Lan eta Garraioen foru diputatua. Bilbaok salatu egin du Metro Bilbaoko aurreko zuzendarietako hiruren “jokabidea, duineza eta inmorala izateagatik gaitzesgarria dena”.
Ahaldun nagusiak aurreratu du Bizkaiko garraioa kudeatzeko organoek aurrerantzean egin behar dituzten bileretan finantzaketarekin zerikusia duten gai guztiak eta burutzen ari diren edo burutzeko dauden proiektuak aztertuko direla, eta iragarri du Metro Bilbaon Zerbitzu Bereziak izenekoak, lehengo zuzendaritzak kendu zituen unean-uneko indargarriak, lehengoratu egingo direla.
Azkenik, Bizkaiko Garraio Partzuergoko lehendakari berriak “normaltasuna eta ordena lehengoratzeko eta jokabide despotikoak eta kudeaketa txarra ezabatzeko” konpromisoa hartu du. “Metro Bilbao garai batean bezala Bizkaitarrentzat berriro urguilua eta sinboloa izan dadila nahi dut”, gehitu du ahaldun nagusiak. José Luis Bilbaok azaldu duenez, bere lehentasunezko helburuetako bat, “langileekiko eta, jakina, erabiltzaileekiko harremanean giro ona lehengoratzea” da.
Metro Bilbaoko aurreko zuzendarien “sasi-kaleratzeak” legezkoak diren aztertuko dute
Gaur eratu da Bizkaiko Garraio Partzuergoko Kontseilu Nagusi berria, Jose Luis Bilbao ahaldun nagusia lehendakari dela. Hain zuzen ere, getxoztarrak "inmoraltzat" jo ditu Metro Bilbao garraio enpresako aurreko kudeatzaileek sinatutako kontratuak, eta horiek “berehala desagerrarazteko” agindu du, “egoera hori berriro ere errepika ez dadin”. Ildo berean, zuzendari horiek kargutik kentzea “Bizkaiko herritarrei milioi erdi euro baino gehiago kostatuko zaielako” adierazi du Bilbaok. Ahaldun nagusiak ezagutzera eman ditu Iñaki Prego Metro Bilbaoko aurreko kontseilari delegatuak (140.000 euro urtean, eta kargua uzteagatik 145.000 euro), Iñaki Echenagusia duela sei hilabetetik zuzendari kudeatzaile izandakoak (93.000 euroko soldata eta beste 93.000 euro kargua uzteagatik) eta Carmen Sarachu giza kapitaleko zuzendari ohiak (260.000 euroko kalte-ordaina) jasotzen zituzten soldatak. Foru agintariak iragarri duenez, datozen egunetan aztertuko dute “sasi-kaleratze horiek” legezkoak diren ala ez, eta baieztatu duenez, Garraio Partzuergoko eta Metro Bilbaoko arduradun politiko berriek “ordainsari txikiagoak izango dituzte, ez dute blindajerik izango, ezta abusuzko edo abantailazko klausularik ere; eta euren kontratuaren amaieran, Administrazioko kargudun publiko guztiek bezalaxe, hileko ordainketa bat jasoko dute”. Gaur egindako lehenengo izendapenen artean, Eneko Arruebarrena Leioako alkate ohia jarri dute Metro Bilbaoko zuzendari kudeatzaile berri. Argazkian, Manu Tejada Lambarri eta Eneko Arruebarrena, hurrenez hurren, Bizkaiko Garraio Partzuergoko eta Metro Bilbaoko zuzendari izendatu dituzte gaur / © Bizkaiko Foru Aldundia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun