Erandioko Udalak eskatuta, Ertzaintzak ikerketa abiatu zuen aipatu jaien aurretik. Polizia Autonomikoak Auzitegi Nazionalera igorri zuen auzia eta Grande Marlaska epaileak diligentziak zabaldu zituen. 2012ko urtarrilean deklaratu ostean, epaiketa aurrera eramatea erabaki zuen Marlaskak. Auziperatu bakoitzarentzat 18 hilabeteko espetxe zigorra eta 8 urteko inhabilitazioa eskatzen du fiskalak.
Erandio-Altzagako Jai Batzordeak eta Hegoalde Kultur Elkarteak "absurdotzat" jotzen dute epaiketa, "epaitutako iragarkian ez zegoelako ez esaldi ez irudi iraingarririk". Are gehiago, "adierazpen askatasuna eskubidearen aurkako eraso larria" dela uste dute.
Hiru erandioztarren aurkako epaiketaz zuzeneko jarraipena egingo du UKBERRI.NETek
Bihar, goizeko 10etatik aurrera, Erandioko hiru auzokide epaituko dituzte Espainiako Auzitegi Nazionalean, Madrilgo San Fernando de Henares herriko pabiloietako batean. Bertatik, zuzeneko jarraipena egingo du UKBERRI.NETek Twitter sare sozialeko profilean zein agerkari digitalaren azalean bertan, bistaren nondik norako guztiak jasotzeko. Auzia 2011ko Erandioko San Agustin jaietako liburuxkan Hegoalde kultur elkarteak ipinitako iragarkiagatik abiatu zuten. Iragarki horretan, Ekin erakunde politiko ilegalizatutako kidea izatea leporatu zioten, Hegoaldeko bi bazkideren alaba den eta egun kalean dagoen Erika Bilbao preso erandioztarraren argazkia agertzen zen, eta arrano beltzaren logotipoa. Hori "terrorismoaren goratzea" delakoan, zigorra ezarri nahi diete, Iñaki Doñabeitia Erandioko Altzaga auzoko Jai Batzordeko presidenteari iragarkia ez zentsuratzeagatik eta Jose Angel Torre "Txantxel" eta Mikel Urriz Hegoalde Kultur elkarteko zuzendaritza kideei iragarkiaren erantzule gisa. Argazkian, Hegoaldek eta Altzagako jai batzordeak burututako prentsaurreko bat.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun