Metro Bilbaoko aurreko zuzendarien kalte-ordainak EAJk ezarri zituela dio Aresek

Rodolfo Ares PSE-EEren Politika idazkariak Metro Bilbao garraio enpresako zuzendaritzako kide ohiek jaso dituzten kalte-ordainak izan zituen hizpide atzo. Buruzagi sozialistak prentsaurrekoa eskaini zuen goizean, Jose Luis Bilbao ahaldun nagusiak eta Bizkaiko Garraio Partzuergoko lehendakari berriak herenegun esandakoari erantzunez. EAJkoak salatu zuenez, horiek kargutik kentzea “Bizkaiko herritarrei milioi erdi euro baino gehiago kostatuko zaie". Aresen arabera, ordea, "ez ditu Alderdi Sozialistak kargutik kendu zuzendaritzako kideak". PSE-EEkoak gaineratu zuenez, "kargutik kendu dituzten metroko zuzendaritzako kideek aurrekoek jaso zuten kalte-ordain bera izan dute. Gardentasuna erabatekoa izan da eta baldintzak aurrez EAJk izendatutako buruzagiek jarritakoak dira".