"Gaur egun ez dago gazteen lonjak erregulatzen duen araudirik. Hori dela eta, beharrezkoa da Gobernu Taldea egiten ari den arautegia. Hala ere, aurkeztu diguten zirriborroa oso permisiboa eta osatugabea iruditzen zaigu", adierazi zuen atzo Arruek. Gauzak horrela, dozena erdi alegazio aurkeztu ditu Getxoko PPk, "lokalean gehienez egon daitekeen pertsona kopurua zehazteko, bertan lo egitea debekatzeko, zaratak eta ordutegiak kontrolatzeko, lonja mota ezberdinen arabera sailkatzeko edota arau-hauste erregimena finkatzeko".
Popularrek ezaugarri eta kokapenaren arabera sailkatu nahi dituzte lonjak: "lehenengoan egongo lirateke zarataz isolatzeko inolako neurririk ez daukaten lokalek eta, gainera, gaine-gainean etxebizitza bat dutenak. Bigarrenean, berriz, zarataz isolatzeko oinarrizko neurriak daukatenak eta etxebizitzarik gainean ez dutenak sartuko lirateke. Eta hirugarrenean, zarataz isolatzeko neurri handiak dituztenak eta auzokideen komunitateetatik kanpo daudenak", Arruek azaldu zuenez.
"Puntuak kenduz", isunak jarriz eta itxiz zigortu nahi ditu gazteen lonjen arau-hausteak Getxoko PPk
Gazteen lonjei puntuen araberako zigor sistema ezartzea proposatu du Getxoko PPk. Udal erroldan izena eman bezain laster, bost puntu izango lituzke lokal bakoitzat eta arau-hauste arin bakoitzarengatik puntu bat kenduko liokete. Horien artean egongo lirateke zaraten arautegia ez betetzea, erantzukizun zibil asegurua indarrean ez izatea edota su-itzalgailua erabiltzeko moduan ez edukitzea. Arau-urraketa larriak izango lirateke higiene neurriak ez hartzea, barruan legez kanpoko substantziak kontsumitzea edota bertan gehienez egon daitekeen pertsona kopurua gainditzea. Horrelako lehenengo arau-hausteak bi puntu galtzea eta lonja hiru hilabetez ixtea ekarriko luke. Bigarrenak, berriz, beste bi puntu galtzea, 200 euroko isuna eta lokala sei hilabetez zerratzea suposatuko luke. Eta hirugarrenak urtebeteko itxiera eta 300 euroko isuna. Azkenik, arau-urraketa oso larriek hiru arau-hauste larriek beste zigorra izango lukete: urtebeteko itxiera eta 300 euroko isuna. Marisa Arrue tokiko popularren bozeramailearen arabera, azken horien artean egongo lirateke, besteak beste, lonjan egiten den jardueraren aldaketa, alkohola banatu edo saltzea, baimenik gabe behin-behineko instalazioak muntatzea eta inguruko auzokideak iraindu edo mehatxatzea. Urtebetean arau-hausterik ez balego, puntu bat irabaziko lukete lokalaren erabiltzaileek. Argazkian, Marisa Arrue Getxoko PPren bozeramailea, artxiboko irudian.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun