Metro Bilbao garraio enpresako LAB sindikatuaren ordezkaritzak idatziak erregistratu zituen atzo Iñigo Lamarka Arartekoari, Bizkaiko batzarretako taldeei eta Gasteizko legebiltzarreko taldeei zuzenduz. Dokumentu horretan orain arte Metro Bilbaoko zuzendaritzari egindako galderak eta jasotako erantzunak azaldu dizkiete denei. "Ez digute galdetu duguna erantzun, hots, bi kargugabetzeen arrazoi zehatzak, nork hartu dituen erabakiak, zer akordio adostu duten", langile erakunde abertzaleko iturriek azaldu dutenez. Horregatik, LABek Arartekoei eta erakundeetako talde politikoei bideratu die eskaria, bi arduradun horiek jasotako kalte-ordainen xehetasunen berri jaso, zabaldu eta ofizial egiteko. Informazio eskaria Iñaki Prego kontseilari ordezkaria zenaren eta Carmen Sarachu Pertsonen Ondarearen zuzendari ohiaren gaietara mugatzen da; "Iñaki Etxenagusia zuzendari nagusi ohiaren kalte-ordaina legezkoa delako, antza, LABen atala sindikalari berak zuzenean esan dionez". Horren harira, gaur, Jose Luis Bilbao Bizkaiko ahaldun nagusiak barkamena eskatu dio Etxenagusiari, kargua utzi zuenean 93.000 euroko kalte-ordaina jaso zuela salatzeagatik, Eitb.com atariak zabaldu duenez. Aipatu hedabideak gaineratutakoaren arabera, Bilbaok aitortu du "hanka-sartze larria" izan dela, izan ere, Etxenagusiak jakinarazi zuen 538 euro jaso zituela eta ezin zituela 93.000 euro jaso, Legeak galarazten duelako. Argazkian, langileen protesta Metro Bilbaoko bulego nagusien aurrean, artxiboko irudian / © LAB Metro Bilbao.
LABen eskaerarekin jarraituz, sindikatu abertzaleak "gauzak argi-argi" nahi ditu bi pertsona horien inguruko gertakariei buruz, azken aldian kargu politikoen artean izaten ari diren tirabirak saihesteko. Amaitzeko, LABen atal sindikalak dei egin die Eneko Arruebarrena Metro Bilbaoko zuzendari nagusi eta Jose Luis Bilbao lehendakari berriei "180 gradu biratzeko", urte hauetako guztietako lan-harremanak kudeatzeko izandako moduetan; baita aurrera egiteko zuzendaritzaren eta sindikatuen arteko informazio eta lankidetzarako bideak ere. Horrela, LABek enpresa-batzordearekin lehenbailehen biltzeko eskatu dio Arruebarrena leioaztarrari; "langileen ordezkariekin eginkizun dituen gai guztiei azkar, arin eta ondo aurre egiteko".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun