EHUko Arte Ederretako graduondoko ikasleek beraien lanak erakutsiko dituzte Miarritzen
Euskal Herriko Unibertsitateko (EHU) Ikerketa eta Sormena Artean Masterreko 17 ikasleren lanekin osatuta dagoen "Mugaz beste" erakusketa inauguratu zuten joan den ostiralean, Miarritzeko Sainte-Eugenie elizako kriptan. Ekimen hori, EHUko Arte Ederretako Fakultateak eta Miarritzeko Des Rocailles arte-eskola nagusiak sinatuta duten lankidetza hitzarmenaren baitan dago. Erakusketa ostiral honetara arte egongo da ikusgai, egunero, arratsaldeko 14:00etatik 18:00etara bitartean. Sarrera librea izango da, EHUko iturriek jakinarazi dutenez. "Mugaz beste" erakusketa kolektiboa formatu handi eta txikiko 34 artelanek osatzen dute, hala nola margoak, grabatuak, eskulturak, instalazioak eta abar. "Teknika ezberdinekin egindako lanak dira, ezaugarri oso ezberdinak dituztenak eta, horietako batzuk, gainera, oso ausartak dira", adierazi du Xabier Agirre EHUko Margolaritza saileko irakasle eta erakusketaren koordinatzaileak. Argazkian, ezkerretik eskumara, Josu Rekalde Arte Ederretako dekanoa, Jon Mikel Euba artista eta Carmelo Garitaonandia Bizkaiko errektoreordea, aurreko erakusketa batean.
Agirrek gaineratu duenez, "arlo artistikoaz gain, erakusketa honek arlo akademiko garrantzitsu bat ere badauka, Des Rocailles eskolako ikasleei zein Iparraldeko jendeari gure masterretan egiten dugun lana erakusteko ere balioko duelako".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun