Gobela ibaiaren uraren maila jaitsi egin da azken orduotan eta ondorioz Getxo udalerri osoaren egoera egonkorra da, udal iturrien arabera. Tokiko erakundeak Larrialdi Udal Plana eta Krisi Mahaia indarrean ditu, eta Udaltzaingoaren patruilak udalerrian uholdeak egoteko arrisku handiena duten guneetatik zaintza egitera pasa dira, prebentzio neurri bezala. "14:00etan burututako azken ikuskatzean Gobela ibaiaren mailak jaisten segitzen duela egiaztatu da. Ibaiak ez du inon gainezka egin. Goizean ur-putzu bat izan da Bolue zelaietatik gertu, baina une honetan konponduta dago", azaldu dute udal arduradunek. Itsas arriskuari dagokionez, eta euri-jasagatik, goizeko lehen orduotan lurjausi txiki bat izan da Algortako Portu Zaharra inguruan. Getxoko Udalak tenperatura baxuek eragindako meteorologia-egoera larrietarako arreta protokoloa ere indarrean jarri du, kaleetan lo egiten duten pertsonak artatzeko. Argazkian, Fadurako zubia urtarril erdialdeko euriteetan.
Larrialdiren bat izatekotan honako telefono zenbaki hauetara deitu behar da: 944 660 202 (Udaltzaingoa) eta 112 (SOS Deiak).
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun