Mari Carmen Urbieta da Leioako alkate berria
2013ko ots. 13a, 11:01
Astelehenean ospatu zen osoko bilkuran Mari Carmen Urbieta Leioako alkate berria izendatu zuen Udalbatzak. Botazioa isilpekoa izan zen eta EAJren hautagaiak bederatzi boto jaso zituen. 2007tik hona udal agintari leioaztarra izan den Eneko Arruebarrena Elizondok alkatetza utzi zuen pasa den astean Metro Bilbaoko zuzendaria izateko. Bere ordez, orain arte Hirigintzako zinegotzia izandakoa izango da alkatea. Mari Carmen Urbieta González: Trapagaranen jaio zen 1955eko uztailaren 19an. Leioan bizi da 1967tik. Ezkonduta dago, seme bat eta alaba bat dauzka. Medikuntzan eta Kirurgian lizentziatua da EHUn; Kirol Medikuntzako masterra; eta Inguruarekiko Arreta eta Osasun Publikoari buruzko Masterra dauzka. Eusko Jaurlaritzako Osasun sailean lan egin zuen luzaroan, Ingurugiroko Osasuneko eta Osasun Publikoaren alorreko hainbat programatako arduradun. Argazkian, Urbieta, besteak beste, Karmelo Sainz de la Maza eta Eneko Arruebarrena alkate ohiak inguratuta / © Leioako Udala.Horretaz gain, Bizkaiko Foru Aldundiko Ingurugiro zuzendaria izan zen 1999 eta 2002 artean, eta aurretik, Osaleneko zuzendariordea izan zen. 2005 eta 2009 artean, Eusko Jaurlaritzako Larrialdiei Aurregiteko Zuzendaritzaren ardura izan zuen. Leioako Udalean Barne Araubideko arduradun izan zen 2007tik 2009ra, eta gaur egun arte, Hirigintza, Etxebizitza, Obra eta Zerbitzuak; Mugikortasun eta Ingurugiro ataleko zinegotzia izan da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun