Eskaerarekin batera aurkeztu beharreko baldintzak, betebeharrak eta dokumentuak Sopelako Udalbatzak 2012. urteko urriaren 31n onartutako Araudian zehazten dira. Araudiaren alde Bilduko zazpi ordezkariek bozkatu zuten; PSE-EE (2) eta PPko (1) zinegotziak abstenitu egin ziren, eta EAJko ordezkariek, aldiz, kontra bozkatu zuten. Alkatearen kalitate-botoaren bidez azkenean araudiaren onarpenak aurrera egin zuen.
Finantza daitezkeen kontzeptuak honakoak dira:
- OHZ, gehienez ere dagokion zenbatekoaren %75.
- Zarama bilketa eta estolderiagatiko tasak; gehienez ere urteko ordainagirien %50.
Artikulu honetako 1. eta 2. kontzeptuak bateragarriak dira, eta hortaz, kontzeptu biengatik eska liteke laguntza.
Pertsona eta familia unitate onuradunek ondoko baldintza hauek bete beharko dituzte:
- Sopelan erroldatuta egotea: eskatzaileek, diru laguntza eskatzen duten unean, gutxienez 12 hilabeteko antzinatasuna izan beharko dute erroldan.
- Egoera hauetako batean egotea: langabezia, Gizarte Segurantzako edozein erregimenetako pentsioduna izatea, lanean egotea lanbidearteko gutxieneko soldataren adinako errentak jasota, Sarrerak Bermatzeko Errentaren jasotzaileak, oro har nahikoa diru baliabiderik ez dutenek.
- Diru laguntza eskatzen zaion higiezinaz aparte, beste higiezin baten jabe ez izatea.
- Familia unitatearen gehienezko ondare erabilgarriak (dirua, tituluak, aseguruak, baloreak, ibilgailuak edo beste jabetza batzuk) ezingo du izan legokiokeen diru sarrerak bermatzeko errentaren urteko gehienezko zenbatekoaren lau halakotik gorakoa.
- Kontzeptu berberengatik eta epe berean diru laguntzak jasota ez izatea.
- e.a. (atxikituta doan Araudian zehazten dira).
Zabalik dago OHZ eta zarama bilketa zein estolderia tasak ordaintzeko laguntza eskatzeko epea Sopelan
Ondasun Higiezinen gaineko Zerga (OHZ) eta zarama bilketa zein estolderia tasak ordaintzeko laguntza eskatzeko epea zabalik dago jada Sopelan. Aipatutako laguntzak errenta maila txikia duten udalerriko familia unitateei zuzenduta daude. Horrenbestez, 2012. urteari dagozkion ordainagiriak aurkezteko epea otsailaren 28ra arte egongo da zabalik, egun hori barne. "Laguntza hauen helburua da errenta maila txikia izan eta krisi ekonomikoak kolpatutako pertsonek eta familia unitateek, langabeek, pentsiodunek, Lanbidearteko Gutxieneko Soldata, Sarrerak Bermatzeko Errenta eta antzekoak jasotzen dutenek udal zergak ordaintzen laguntzea, pertsona eta familia horiek gizartean baztertuta geratzeko arriskurik izan ez dezaten", azaldu dute udal iturriek. Eskaerak Sopelarinen, Larrabasterrako herritarren arretarako bulegoan, aurkeztu beharko dira (Gatzarriñe 2 / telefono zenbakia: 946 569 494). Hurrengo urteetan, 2013koa barne, urte bakoitzeko azaroaren 15 eta 30 artean aurkeztu beharko dira. Argazkian, udal bilkura Sopelan, artxiboko irudian / © Sopelako Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun