Plentziako Independenteen eta EAJren arteko hitzarmena apurtuta, jelkideek zituzten ardurak beregain hartu dituzte independenteek, "El Correo Español" egunkariak zabaldu duenez. Gauzak horrela, Isamari Zarauza alkatea izango da Herri lanak, Zerbitzuak eta Kirolak; Merkataritza eta Jaiak; Gazteria; eta Ibaia, Portua, Hondartza eta Turismo arloetako zuzendaria. Hala ere, Herri lanak, Zerbitzuak eta Kirolak gaietan Silvia López de Guereñu Hirigintza zinegotzi eta alkateordearen laguntza izango du udal agintariak. Eta Gazterian, Ramón Anasagasti Kultura, Hirugarren Adina eta Osasun zinegotziarena, aipatu hedabidearen arabera. 2013ko aurrekontuen bozketak bertan behera utzi zuen 2011ko udal hauteskundeen ostean Plentziako Independenteek eta EAJk egindako hitzarmena. Lehenengoek sei botoren aldea atera zieten jelkideei eta, negoziaketen ostean, azken hauek ez zuten oztoporik jarri Zarauza alkatetzara heltzeko. Horren ordez, Herri lanak, Zerbitzuak eta Kirolak; Merkataritza eta Jaiak; Gazteria; eta Ibaia, Portua, Hondartza eta Turismo arloak eskuratu zituen EAJk. Aurrekontuen kontra bozkatu ostean, baina, kendu egin zizkien ardurak Zarauza udal agintari independenteak. Argazkian, Isamari Zarauza Plentziako alkatea.
2012ko aurrekontuak luzatuta arituko da aurten Plentziako Udala. Izan ere, urtarrileko osoko bilkuran, Isamari Zarauza alkate duten Independenteen lau botoak ez ziren nahikoak izan 4.300.000 euro inguruko kontuak aurrera ateratzeko. EAJko lau zinegotziek aurka bozkatu zuten, "akordioa bilatzen saiatu arren, elkar ulertzea ezinezkoa izan delako", "Deia" egunkariak zabaldutakoaren arabera. Bilduko hiru ordezkariek ere kontrako bozka eman zuten, "koalizioak egindako proposamen guztiei ezezkoa eman diotelako".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun