Jose Angel Torre "Txantxel" eta Mikel Urriz Hegoalde kultur elkarteko zuzendaritzako partaideak eta Iñaki Doñabeitia Erandioko Altzaga auzoko Jai Batzordeko kidea absolbitu ditu Espainiako Auzitegi Nazionaleko Areto Penaleko Bigarren Atalak. Hilaren 5ean epaitu zituzten hirurak, 2011ko Erandioko San Agustin jaietako liburuxkan Hegoalde kultur elkarteak ipinitako iragarkiagatik. Grande Marlaska epaile instruktoreak eta fiskalak urte eta erdiz mantendu dute Ekin erakunde ilegalizatuaren kidea zelakoan preso prebentibo zegoen Erika Bilbaoren argazkia, "Erika maite zaitugu" testua eta Arrano Beltz bat agertzea nahikoa zela akusatuei "terrorismoaren goratze" delitua leporatzeko. Aretoko epaileak, berriz, bi aste baino gutxiago behar izan du aipatutako usteak ustel utzi eta teoria hori suntsitzeko. Gauzak horrela, epaileak ez du ustezko delituan akusatuen egiletza frogatutzat jotzen eta, are garrantzitsuena dena, ez du Hegoalde elkartearen iragarkian delitu frogarik ikusten. Jose Angel Torre "Txantxel" Hegoaldeko presidenteordeak UKBERRI.NETi adierazi dionez, sententziak ukatu egiten du preso baten argazkia plazaratze hutsa "terrorismoaren goratzea" denik. Argazkian, Erandioko jai batzordeak eta Hegoaldek antolatutako agerraldietariko bat.
Iragarkian ematen diren elementuak kontuan hartuta, salaketa hori frogatuta ez dagoela uste du epaileak eta, aldiz, defentsak aurkeztutako arlo pertsonaleko irakurketa baliagarriagotzat jo du. Era berean, ukatzen du Arrano Beltza ETAren ikurra izatea, Marlaskak eta fiskalak sostengatzen zuten moduan. Hortaz, esan daiteke epai horrek jarraitzen duela epaitegi berak otsailaren 5ean zabaldutakoa, zeinak bi itzubaltzetar absolbitzen zituena antzeko kasu batean. Udalerrian auzi "absurdo hau" abiatu zutenei ardurak eskatzeko garaia heldu dela azaldu du Iñaki Doñabeitia Erandioko jai batzordeko kideak, Arrizen Monasterio Herritarren Segurtasunerako zinegotziari erreferentzia eginez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun