Iñaki Gonzalo Casal "Kitxu" Getxo eta Egin irratietako kazetari izandakoa, 1994ko urriaren 25ean atxilotu zuten Areetako Bizkaiko Zubiko plazan, Andoni Muñoz urduliztarra, eta Algortako Iñigo Otazua "Oti" zein Angel Figueroarekin batera. Ekintzarik burutu ez zuen Lanbroa komandoko kideak izatea leporatu zieten lauei, 30 urteko zigorra ezarriz. Egun Valladolideko espetxean, 19 urte daramatza preso. Irteera data 2013ko maiatzaren 4rako bazuen ere, "orain baliteke 11 urte gehiago barruan eman behar izatea", Itzubaltzetako Herrira bilguneak zabaldu duenez.
Atzoko manifestazioa argazkitan
Iñaki Gonzalo Casal "Kitxu" preso politiko itzubaltzetarrak "herritarron maitasuna, atxikimendua eta babesa izan du, badauka eta izango du etorkizunean". Horrela azaldu zuten atzo Itzubaltzetako Herrira bilguneko kideeek herriko Kolas plazan egindako asanblada informatiboan. Presoen eskubideen aldeko ekimenak azaldu zuenez, Estatu espainolak Casali 197/2006 edo Parot ezizenez ezaguna den dotrika aplikatu izanak beste behin gerra estrategia eta presoekiko krudelkeria hautatu dituela berresten du. Ekimen horren bidez, euskal presoak, haien senide, lagun eta herritarrak "etsitzea" eta datorren martxoaren 20an dotrina epaitu behar duen Estrasburgo Giza Eskubideen Auzitegiari "presioa egitea" bilatzen ditu Estatuak, Herriraren ustez. Casalen aurkako neurriari erantzuteko batzar berezia deitu dute biharko, 19:30erako, Ezekiel Agirre kaleko 14. atariko lokaletan. Argazkian, atzo 300 auzokidek baino gehiagok salatu zuten manifestazioan "Kitxu"ri espetxe zigorra luzatu izana. Martxaren ostean errepidea moztu zuten.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun