Hirubi Triatloi Elkarteak eta Euskadiko Triatloi Federazioak antolatuta, gaur arratsaldean jokatu da Sopelako duatloiaren zortzigarren edizioa, sprint distantzian. Lasterketaren emakume irabazlea Inma Pereiro Gonzalez etxebarritarra, SVC seguritate enpresa taldekoa, izan da, 1:04:38ko denbora egin duela. Bere atzean, Ana Casares eta Lourdes Oiartzabal sailkatu dira, hurrenez hurren 1'56" eta 2'47"-ra. Gizonezkoen artean, Mikel Elgezabal gernikarra Fernandez izan da aurrena helmugan, 55 minutu eta 17segundoko marka eginda. Berarekin, Iurgi Etxeandia eta Kuentz Benoit igo dira podiumera. Taldeka, Enkarterriko Triatloi Taldea izan da hoberena. Sopelakoa Hego Euskal Herriko Duatloi Zirkuitoko urteko lehenengo proba puntuagarria izan da. Argazkian, gizonezkoen podiuma / @ Jon Alegria Uzkudun - Euskadiko Triatloi Federazioa.
Probaren irteera udaletxe alboan jarri dute, Aretxabaleta plazan. Hasteko, 5,2 kilometroko ibilbidea osatu behar izan dute atletek, korrika, Sopelako herrigunean prestatutako zirkuituari buelta bi emanez. Ostean, bizikleta hartu eta Urdulizeraino joan dira parte-hartzaileak, Barrika eta Plentziatik igaroz, bertara helduta bueltako bidea hartzeko. Guztira, 19,2 kilometro. Azkenik, hasierako zirkuituari buelta bakarra (2,5 kilometro) eman behar izan diote, berriro ere lasterka.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun