Egoera ilun horren aurrean, Etxerat osatzen duten guztien lanak "ezinbestekoa izaten jarraitzen" duela ziurtatu zuten. Horrekin batera, preso, iheslari eta deportatuen senide eta lagunen arteko kohesioa eta elkartasuna lantzen jarraitzera deitu zuten, "gure artean sortzen den elkarlana oso baliagarria baitzaigu errepresaliatuen aurka ematen den mendeku politika honi aurre egiteko". Euskal errepresaliatu politikoen errealitatea islatzen saiatuko dira eta euren inguruko informazioa, salaketa eta testigantza ematen jarraituko dute. Argi utzi zuten errepresaliatu guztien inguruan hitz egiten dutenean, "presoez gain iheslariez eta deportatuez ere ari gara".
197/2006 dotrina
Senide eta lagunen beraien eskubideak ere errespetatuak izan daitezen ere lan egingo dute: "jendarteak bakerako eta bizikidetzarako apustua egina duen testuinguru honetan, guk bizi dugun errealitatea ezagutarazi nahi dugu. Herri honetan gatazka luze batek pertsona askorengan eragin duen eta eragiten duen sufrimenduaren aitortza ezinbestekoa da, bai gizartearengandik eta baita agintari eta instituzioengandik ere".
Gauzak horrela, lanean jarraitzera deitu zuten: "lanean guztion eskubideak errespetatuak izan daitezen. Lanean gure senide eta lagunak gurekin izan arte". Bide horretan, epe motzean, senide eta lagun presoen eskubideekin estuki lotuta dagoen garrantzi handiko hitzordua gogoratu zuten, martxoaren 20a, alegia. Data horretan, Europako Giza Eskubideen Auzitegian Ines del Rioren kasuaren inguruko ebazpena dela eta, Espainiak jarritako helegitea aztertzen hasiko dira. Eta baliteke Etxeratek "ezinbestekotzat" jo duen "mugarria" orduan jartzea. Izan ere, 197/2006 dotrinaren aplikazioa "neurri krudela da", eta Estrasburgoko epaiak argi utzi bezala "presoen giza eskubideen aurkako eraso zuzena da". Neurri horrek euskal preso politikoei bizi osorako espetxe zigorra aplikatzea ahalbidetzeaz gain, "senide eta lagunoi ere salbuespeneko espetxe politika baten ondorioak bizi osoan jasatea eragiten digu".
Horregatik, ezinbestekotzat jo zuten "guztion babesari esker" martxoaren 20an aztertzen hasiko diren helegite horri aurre egin, eta 197/2006 dotrina bertan behera uzteko lan egitea. "Behingoz, Estrasburgok mendekua besterik bilatzen ez duen neurri honi ateak parez pare ixtea lortu behar dugu, eta horrela gure senide eta lagunen eskubideak behingoz errespetatzen hasi, eta 197/2006 doktrina aplikatuta duten euskal preso politiko guztiak aske uztea. Eta ziur gaude guztion lanari esker lortuko dugula gure helburuak betetzea. Benetan lortuko dugu!", adierazi zuten Etxerateko kideek.
Etxerat euskal preso, iheslari eta deportatu politikoen senide eta lagunen elkarteak XII. Nazio Batzarra burutu zuen atzo Leioa eta Erandioko Campusean. Urteroko hitzordu horretan, heldu den urteari begirako lan ildo nagusiak eta eginbeharrak finkatu zituzten, 197/2006 dotrinaren aurkako borroka lehenetsiz. Era berean, Espainiak Ines del Rio presoaren auzian salbuespen neurri hori mantentzeko jarritako helegitea Estrasburgoko Europako Giza Eskubideen Auzitegian aztertzen hasiko direla, martxoaren 20ko dataren inguruan lan egitera deitu dute. Egungo egoeraren diagnostiko atalean, "senide eta lagunok behin eta berriz argi utzi dugun bezala euskal preso politikoen egoerak okerrera egin du", azaldu zutenez. "Euskal jendartearen gehiengoak Bilboko kaleetan erakutsitako nahia eta egindako eskaera ez da bete. Horren lekuko direlarik gure senide presoek bizi duten egunerokoa, iheslari eta deportatuen egoera eta gure bizipenak. Mendekua besterik bilatzen ez duen espetxe politika anker baten ondorioak sufritzen ditugu guztiok; baita guk geuk ere, politika honen helburuetako bat baikara", salatu du Etxeratek. Argazkian, atzoko batzarraren irudi bat / © Etxerat.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun