Metodologia hiru ardatzetan oinarritua egongo da: murriztea, berrerabiltzea eta birziklatzea, hondakinen kudeaketaren arloan lehentasunen ordena ezarriz.
Horri jarraiki, lehenengo helburu nagusia hondakinak ahalik eta gehien murriztea da, bai arlo kuantitatiboan (hondakin fluxuaren pisua edota bolumena gutxitzea), bai arlo kualitatiboan (hondakinen toxikotasuna edota arriskugarritasuna gutxitzea). Esan ohi denez, "hondakinik onena sortzen ez den hondakina da".
Berrerabiltzea, berriz, lehenago ere erabili izan dugun objektu bat jatorrizko xederako berriro baliatzea da. Erabiltzaileak objektu hori erabiltzeko, hobetu edo zaharberritu egin dezake; bestela bere horretan utz dezake, aldarazi barik, baldin eta erabiltzaile berriarentzat erabilgarria bada. Arlo honetan hainbat aukera dago, bai eta enpleguari dagokionez ere.
Birziklatzeari buruz, batzuetan badira ezin berrerabil daitezkeen gauza batzuk. Birziklatzeak, ezabaketa edo balorizazio arloetarako xedatzen diren gaiak gutxitu ez ezik, lehengai gutxiago kontsumitzea ere eragiten du.
Batzarrak
Arlo bakoitzarekiko gutxienezko bilera bi egingo dira: lehenengoan gaiari lotutako ekimen ezberdinak aztertuko dira, eta bigarrenean, aldiz, ekimen horietatik martxan zein jarriko den erabakiko da. "Batzordeak erabakiak hartzen doan heinean, batzordeak berak Sopelan hondakinen kudeaketarekin lotura duten gaien inguruko jarraipena egingo du", azaldu dutenez. Izan ere, batzordearen helburu nagusia "ingurumenean eragin gutxien sortuko duen hondakinen kudeaketa" lortzea da, alderdi politiko zein elkarteen parte-hartzea ahalbidetuz.
Udal arduradunen ustez, "ekimen honek komunikazio-sareak hobetuko ditu eta hainbat onura ekarriko ditu, erabakiak hartzerako orduan herriko ikuspegi ezberdinak kontuan hartuko direlako: enpleguaren sustapena, hobekuntza sozioekonomikoak, eta abar".
Hondakinak Kudeatzeko Aholku Batzordea jendaurrean aurkeztuko dute gaur Sopelan
Sopelako Udalak gaur aurkeztuko du jendaurrean Hondakinak ahalik eta ondoen Kudeatzeko Aholku Batzordea. Hitzordua 20:00etan izango da, udaletxeko sarreran. Aurkezpen horretan aipatu batzordearen funtzionamendua, osaketa, metodologia eta helburuak zeintzuk diren azalduko dira, tokiko iturriek aipatu dutenez. Era berean, hondakinen kudeaketaren inguruko oinarrizko informazioa eta formazioa ere eskainiko da. Aurkezpena publikoa izango da. Beraz, gai honetan beren-beregi interesa duten herritarrek bertara joateko aukera izango dute, baita ekarpenak egiteko aukera ere. Batzordearen maiztasuna hilerokoa izango da, baina parte-hartzaileek bestelako maiztasuna erabaki ahal izango dute, prozesuaren baitan sortzen diren beharrizanei aurre egiteko. Hala ere, Udaletik adierazi dutenez, erakunde hori ez da erabakigarria izango (bere txostenak udal bilkurak berretsi beharko ditu), eta alderdi politikoez eta herrian erregistratuta dauden elkarteez osatuta egongo da. Boto eskubidea %50-era banatuta egongo da. Interesa duten herritarrek bertara joateko eskubidea izango dute, nahiz eta bozkatzeko aukerarik ez izan. Argazkian, aurreko bilkura bat udaletxeko sarreran / © Sopelako Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun