Bizkaiko Foru Aldundiak berritu egingo du Barik txartelaren web orrialdean Bizkaibus zerbitzuari buruz dagoen informazioa, Itziar Garamendi Herri Lan eta Garraio Saileko buruak asteartean Gernikan adierazi duenez. Batzar Nagusien osoko bilkuran, Garamendik iragarri zuen Bizkaiko Garraio Partzuergoari (BGP) eskatuko diola Bizkaibuseko kabinak jaso daitezela Barik txartela saldu eta kargatzeko guneen zerrendan. Herri Lan eta Garraioen diputatuak adierazi zuen "haserre" dagoela joan den astera arte www.tarjetabarik.net web orrialdean Bizkaibusi buruzko informazioa "osatu eta eguneratu gabe" zegoelako. Gernikako agerraldian, Garamendik gogorarazi zuen Bizkaibuseko kabinetan Barik txartela kargatzeko beharrezkoa den teknologia dagoela, eta, beraz, zerbitzu hori agertu behar zela web orrialdeko informazioan. Azkenik, foru arduradunak adierazi zuenez, Bizkaibus kabinetan, orain arte legez, kargatu ahal izango da Barik txartela, Bizkaiko Garraio Partzuergoarekin lankidetzan eta koordinatuta. Argazkia: cc-by-sa aiaraldea.com.
Herri Lan eta Garraioen diputatuak adierazi zuen "BGPren aurreko kudeatzaileek sortu zutela web orrialdea, eta Aldundiak ez duela orrialdearen kontratazioaren, edukiaren eta eguneratzearen berririk izan". Eta gaineratu zuen "gardentasuna, hain zuzen, ez zela BGPren aurreko kudeatzaileen bertuteetako bat".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun