Ildo berean, atzo ehunaka lagunek hartu zuten parte eskualdean 197/2006 dotrinaren aurkako azken ostiraleko mobilizazioetan. Besteak beste, Algortan 140 bat pertsona batu ziren, Bilgune Feministak deituta. Itzubaltzetan, 76 izan ziren; Plentzian, 16; Lemoizen, 14; eta Urdulizen eta Gorlizen, hamarna. Leioan, Sopelan eta Erandion ere izan ziren protestak.
Iñaki Gonzalo Casal "Kitxu" egun Valladolideko espetxean dago eta 18 urte eta lau hilabete daramatza preso. Urte gehienetan sakabanaketa politikaren biktima izateaz gain, FIES erregimena eta isolamendua ere pairatu ditu. Irteera data 2013ko maiatzaren 4rako bazuen ere, orain baliteke 11 urte gehiago barruan eman behar izatea.
Iñaki Gonzalo Casal "Kitxu" preso politiko itzubaltzetarrari 197/2006 edo Parot ezizenez ezaguna den dotrina aplikatu izana salatu eta bere askatasuna eskatzeko sinadura bilketa hasi zuen Herrirak atzoko Algortako zein Itzubaltzeta / Romoko elkarretaratzeetan. Sinaduren xedea Getxoko Udalbatzari dotrinaren aurka azaldu eta "Kitxu" zein zigorra luzatu dieten presoen askatasuna galdegin ditzan eskatzea da. Euskal presoen aldeko herri bilguneak gogoratu duenez, martxoaren 20an, Europako Giza Eskubideen Auzitegiko Areto Nagusiak Ines del Rio presoaren auzia berraztertuko du. 2012ko uztailaren 12an Estrasburgoko auzitegiak giza eskubideen aurkakotzat jo zuen presoari dotrina ezarri izana. Askatu beharrean, helegitea jarri zuen Espainiako Gobernuak. Del Riori buruz hartuko den erabakiak beste 73 euskal presorengan eragina izango du, tartean "Kitxu"-rengan. Itzubaltzeta / Romoko Branka herriko tabernan ez ezik, Algortako Amnistia tabernan eta Abian kultur elkartean ere egongo da sinatzeko aukera. Bestalde, sinadura orria hemendik jaitsi daiteke. Argazkian, otsailaren 15ean 300 auzokidek baino gehiagok salatu zuten Iñaki Gonzalo Casal "Kitxu" herriko preso politikoari Parot Dotrina erabiliz espetxe zigorra luzatu izana
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun