Gazte bat atxilotu dute Algortan beste bati kolpatu eta motxila lapurtzea egotzita

Ertzaintzak 20 urteko gizonezko bat atxilotu zuen joan den larunbatean Algortan, beste gazte bati eraso eta lapurtzea leporatuta. Eusko Jaurlaritzaren Segurtasun Sailaren arabera, goizeko 7:20 aldera jaso zuen abisua polizia autonomikoak, Bidezabalgo metro geltokian lagun bat kolpatu zutela esanez. Ertzainak bertara heltzean, tokiko segurtasun zaindariak artatzen ari ziren mutila, aurpegia handituta eta odola zeukala. Ondoren, anbulantzia batek eraman zuen Gurutzetako ospitalera. Bada, beste gazte batek eraso eta motxila lapurtu zion horri, polizia iturriek zabaldutakoaren arabera. Lortutako deskribapenaz baliatuta, bilatzen hasi eta Algortako Telletxe plaza inguruan identifikatu eta atxilotu zuten ustezko erasotzailea. Atzo eraman zuten epailearen aurrera.