Ostiral honetan, martxoak 1, Korrika 18 euskararen aldeko lasterketaren eskualde mailako aurkezpena egingo dute Erandion. Hitzordua 19:00etan jarri dute, Altzagako azoka zaharrean. Hain zuzen ere, hori guztia antolatzeko laguntzaile bila dabil Berbots Erandion Euskaraz! taldea. "Zuen laguntza behar dugu, dan-dana prestatzeko: azoka atondu, gauza bakoitza bere lekuan jarri... Betikoa: askoren artean erraza, baina gutxi egonez gero... zaila. Lagundu egingo diguzu?", azaldu dutenez. Horretarako, 16:30ean lotu dira Altzagako azoka zaharrean. Konfirmatzeko ondoko posta elektroniko helbidera idatzi beharko da: berbots[abildua]gmail.com. Argazkian, Korrika 17, 2011n, eskualdean barrena.
Korrikaren aurkezpenean ondokoak izango dira: giroa berotzeko trikitilari eta pandero-joleak, bertsolariak, Korrikaren musikarekin umeen dantzalditxoa, Korrikaren mezua, "Euskaraz bizi nahi dut" abestian oinarritutako neska-mutilen beste dantzalditxo bat, bertso jarriak (neska-mutikoak), Korrikaren inguruan gertu izango ditugun ekitaldi nagusien berri, moda desfilea (batzuk patinetan), eta luncha. Amaitzeko, dantzaldia eskainiko du 20:30etik aurrera Garilak 26 taldeak. Ekitaldia Txema Montoya ETB2ko "El Conquistador del Fin del Mundo" saioko zuzendariak eta Aiora Sedano aktoreak aurkeztuko dute. Gainera, Korrikaren materiala salgai egongo da eta txosna ere egongo da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun